A Consellería de Educación vén de conceder, en colaboración co Ministerio de Educación, axudas a 37 centros educativos para que 550 nenos e nenas de 4º, 5º e 6º de Primaria participen no programa formativo-cultural ‘Escolas Viaxeiras’ durante o ano 2010.Grazas a esta achega, cada grupo de escolares seleccionados –formado por un máximo de 15 nenos e nenas acompañados dun profesor ou profesora- viaxará a unha Comunidade Autónoma, para coñecer as súas xentes, costumes, natureza, historia e recursos. A través destas visitas, os rapaces e rapazas aprenden a aceptar as diferenzas culturais dentro do seu entorno máis inmediato –o nacional-, e adquiren hábitos de defensa e conservación do ambiente e o patrimonio artístico e histórico.
As rutas
As ‘Escolas Viaxeiras’ reservan tamén un importante espazo á natureza, con percorridos pola ribeiras do Duero e o Ebro; as particularidades da flora e fauna de Tenerife, e das Cañadas do Teide; ou os vales pirenaicos.
As viaxes desenvolveranse en dúas quendas, a primeira delas entre o 14 de marzo e o 6 de xuño; a segunda entre o 26 de setembro e o 5 de decembro; e terán una semana de duración. Ao final das mesmas, alumnado e profesorado participante terá que realizar unha memoria de avaliación no que recollan as experiencias vividas, e valoren os coñecementos adquiridos e actitudes suscitadas por mor da viaxe.
Por último, as rutas prestan tamén atención especial ao Camiño de Santiago, con paradas en Puente la Reina e Estella, en Navarra; e un percorrido polos seus escenarios máis destacados en La Rioja.
Nesta ocasión, os 37 grupos seleccionados para participar nas ‘Escolas Viaxeiras’ percorrerán dezaoito itinerarios diferentes, a través de catorce Comunidades Autónomas, rexistrando as súas experiencias nun caderno de viaxe.
Entre os lugares que visitarán, os rapaces e rapazas coñecerán as industrias alimentarias do aceite e o mel na Andalucía Occidental; os cultivos intensivos baixo plástico de El Ejido; as industrias de transformación agrícolas de Cataluña; os recursos pesqueiros do País Vasco; ou os invernadoiros da rexión de Murcia.
