A Deputación de Pontevedra aprobou unha nova convocatoria de axudas para deportistas non profesionais que, ó longo do 2016, participaron en eventos nacionais e internacionais incluídos nos calendarios oficiais das federacións deportivas. Estas achegas, por valor de 60.000 euros poderán solicitarse ata o 5 de decembro.
Como principal novidade, con respecto ós anos anteriores, cómpre destacar que por vez primeira se incorpora nunhas bases de subvencións para deportistas a renda como criterio, o que permitirá que aquelas persoas con menos recursos teñan máis posibilidades de optar ás achegas. Por outra banda, e tamén por primeira vez, se inclúe nesta convocatoria tanto o deporte adaptado como o deporte feminino.
As axudas para deportistas individuais, reguladas a través de bases e mediante o procedemento de concorrencia competitiva ordinaria, destinaranse a proxectos de actividades deportivas realizadas desde o 1 de xaneiro de 2016 e ata o fin de prazo de presentación das solicitudes (5 de decembro). A través das mesmas a institución provincial subvencionará tanto os gastos por desprazamento, como de aloxamento e inscricións en competicións deportivas enmarcadas nos calendarios oficiais das federacións deportivas.
