O BNG de Ponteareas revelou, a través da súa concelleira Hortensia Bautista, que o Concello está perdendo subvencións por non someterse a fiscalización do Consello de Contas de Galicia. Así se recolle no Diario Oficial de Galicia do día de hoxe 10 de maio. En concreto trátase dunha subvención para o departamento de Normalización Lingüística. A Consellaría de Cultura e Educación indica que os motivos polos que Ponteareas perdeu a subvención solicitada foi por presentar as contas do ano 2011 fora de prazo e con graves defectos, tal como recolle o informe do Consello de Contas do pasado 21 de marzo.
O BNG cualificou este feito de “gravísimo” e pediu a asunción de responsabilidades políticas por parte da concelleira de facenda, Belén Villar. Hortensia Bautista cualificou de “impresentable que o Concello estea arruinado por culpa do PP, que se estén recortando servizos, que só se preocupen de subir impostos e que ao mesmo tempo se deixen de percibir subvencións por incapacidade para xestionar o Concello”.
Os nacionalistas esixen a concelleira de facenda e ao alcalde que “dean a cara e ofrezan explicacións” ademais de aclarar si se perderon outras axudas ou se renunciou a solicitalas por recoñecer a incapacidade para cumprir coas obrigas de fiscalización do Consello de Contas.
O Bloque lembrou a responsabilidade dos concelleiros de PSOE e de ACIP nesta situación. Renunciaron a aplicar desde o goberno o plan de saneamento económico que pactaran co BNG e prefiren seguir cun Alcalde e un goberno incompetente, que levou a Ponteareas á quebra económica, antes que apostar por un novo futuro liderado polo BNG.
