María L. García | vigoalminuto
O centro social de Mosende está un paso máis preto da súa ampliación. O pleno do Concello do Porriño aprobou este luns o cambio de uso dos terreos situados xunto á igrexa de San Xurxo, nas Madorras, para permitir que o complexo parroquial incorpore tamén actividades socioculturais. A modificación urbanística era necesaria para poder licitar as obras de ampliación do edificio municipal.
Ata o de agora, os terreos, doados ao Concello pola Asociación de Veciños San Xurxo, tiñan os usos restrinxidos ao ámbito relixioso. A aprobación plenaria permite incorporar o uso sociocultural e avanzar na tramitación dun proxecto que busca ampliar os espazos dispoñibles para as actividades da parroquia.
Un salón de actos de máis de 162 metros cadrados
A actuación prevé ampliar cara ao lateral esquerdo o edificio orixinal, construído en 2001, e conectalo coa nova edificación mediante unha galería acristalada. O obxectivo é integrar ambos os inmobles nun único complexo destinado a reunións, ensaios, actuacións e outras actividades comunitarias.
Un dos elementos centrais do proxecto será un salón diáfano de máis de 162 metros cadrados, preparado para funcionar como espazo de actos e ensaios. Contará cun escenario elevado, vestiarios na parte traseira, baños adaptados e un almacén.
A ampliación incluirá tamén unha terraza exterior de 272 metros cadrados, concibida para celebrar actividades ao aire libre. O proxecto contempla, ademais, a mellora dos accesos e a humanización dos espazos exteriores para facilitar o uso das instalacións.
Pedra granítica e eficiencia enerxética
O deseño arquitectónico busca integrar a nova construción na contorna patrimonial protexida da igrexa parroquial de San Xurxo. Para iso, o proxecto prevé unha fachada de pedra granítica e unha cuberta a dúas augas con tella cerámica plana de cor gris.
A intervención incorpora tamén solucións de illamento termoacústico e un sistema de climatización eficiente mediante bomba de calor.
OuTraS NoVaS
- O Porriño desbloquea a ampliación do centro social de Mosende
- O Galician Freaky Film Festival leva o terror de Halloween aos Cines Tamberlick cunha experiencia inmersiva
- Galicia conquista el mundo del piragüismo: oro para Tania Fernández y Tania Álvarez y plata para Duro y Garrido
- El Concello exige la dimisión de la conselleira de Medio Ambiente, tras cinco años reclamando agua depurada para limpiar las calles
- Lula logra una remontada histórica en Brasil y derrota a la derecha extrema
