Carlos Díaz | Vigo Al Minuto
O acceso á vivenda está a engadir un novo obstáculo para os estudantes universitarios que teñen que desprazarse para cursar os seus estudos. A portavoz nacional do BNG, Ana Pontón, propuxo crear unha bolsa de alugueiro específica para universitarios e ampliar a rede de residencias públicas nos campus galegos.
Pontón defendeu hoxe en Vigo, onde estivo coa nova reitora da Universidade de Vigo, Carmen García Mateo, que as consellerías e as universidades colaboren para poñer en marcha unha bolsa que permita ofrecer aos estudantes alugueiros a prezos accesibles e en condicións dignas. Segundo explicou, sería unha medida que non requiriría novas infraestruturas, senón coordinación entre as administracións e as universidades.
Residencias públicas
A segunda proposta pasa por incrementar o número de prazas de residencia pública. Pontón cifrou en arredor de 64.000 os estudantes do sistema universitario galego e en aproximadamente 2.000 as prazas de residencia existentes. Coas cifras que manexa o BNG, habería así unha praza por cada 32 estudantes, aínda que Pontón utilizou na súa intervención a proporción dunha por cada 45.
A líder da oposición no Parlamento de Galicia asegurou que nos últimos anos non se incrementou o número de prazas públicas de residencia vinculadas ás universidades galegas, mentres que si aumentaron as de carácter privado. A partir desta situación, o BNG reclama a construción dunha residencia universitaria pública en cada campus.
Esta proposta chega nun contexto no que o acceso á vivenda se converteu nun dos principais asuntos do debate político galego. O BNG vén reclamando medidas para ampliar o parque público e actuar sobre o mercado do alugueiro. En xullo, Pontón xa expuxera a creación dunha bolsa pública de vivendas en alugueiro para estudantes durante unha reunión coa reitora da Universidade de Santiago.
Para Pontón, o custo do alugueiro pode engadir unha carga económica aos estudantes que xa deben afrontar gastos asociados ao desprazamento e á súa formación. “Non pode ser que precisamente o alugueiro se converta nun elemento que impida poder desenvolver a túa carreira universitaria”, sinalou.
A proposta do BNG combina así dúas vías diferentes: facilitar o acceso a vivendas de alugueiro para estudantes a través dunha bolsa específica e aumentar a oferta de aloxamento universitario público. A formación nacionalista defende que estas medidas se incorporen ás políticas de vivenda e universidade da Xunta.
OuTraS NoVaS
- El Gobierno subirá el salario mínimo un 5,3% en 2027, hasta los 1.286 euros al mes
- Se vas a Calvos de Randín leva unha chaqueta: 9 graos baixo cero que apuntan á baixada de temperaturas en toda Galicia
- Caballero anuncia, de nuevo, asfaltados en 210 calles, tras las constantes quejas por el estado del firme en la ciudad
- ‘Poñede a Rueda na lista de espera’, gritan miles de manifestantes por las calles de Vigo
- ¿Seguirán las tiendas en la Alameda? La acampada de la vivienda de Vigo decide su futuro el sábado (Vídeo)
