O BNG oponse á suba do 5,5% dos salarios dos cargos electos que propón o goberno municipal

María L. García | vigoalminuto

O Bloque Nacionalista Galego (BNG) quere que os cargos políticos do Concello de Vigo con dedicación exclusiva ou parcial manteñan en 2027 as mesmas retribucións que este ano. A formación presentou unha emenda ás Bases de Execución do Orzamento municipal para rexeitar a actualización do 5,5% prevista polo Goberno de Abel Caballero e conxelar os salarios da Corporación.

O portavoz municipal do BNG, Xabier P. Igrexas, considera que a suba non está xustificada nunha cidade na que, segundo denuncia, unha parte importante da poboación sofre precariedade laboral e dificultades económicas.

Cos incrementos propostos, o salario anual do alcalde superaría os 82.500 euros, mentres que as retribucións dos concelleiros con dedicación exclusiva pasarían dos 71.000 euros.

Máis de catro veces o salario mínimo

«Non teñen xustificación retribucións que son máis de catro veces o salario mínimo e que se sitúan por riba das categorías máis altas do persoal público», afirma Igrexas.

A proposta do BNG non cuestiona que a representación institucional deba contar cunha remuneración suficiente. O portavoz nacionalista defende que as condicións económicas permitan participar na vida política a persoas de calquera orixe e situación profesional, pero considera que ese principio non ampara salarios que se afastan dos ingresos da maioría social.

«Unha cousa é garantir retribucións económicas dignas, e outra fixarse salarios estratosféricos nunha cidade na que preto dunha de cada tres persoas traballadoras están por debaixo do salario mínimo», sostén.

Igrexas cualifica de especialmente inxustificable o incremento nun contexto de carestía da vida e dificultades para numerosos fogares. «É rotundamente inaceptábel que se continúe a alargar a distancia entre as retribucións dos e das representantes institucionais da cidade cos da maioría social», denuncia.

O BNG tamén cuestiona os salarios do persoal eventual

A emenda á proposta orzamentaria enmárcase nunha reivindicación que os nacionalistas manteñen desde hai anos: abrir un debate sobre a racionalización das retribucións dos cargos políticos municipais e do persoal eventual ou de confianza.

Nese ámbito, Igrexas cuestiona que familiares directos de integrantes do Goberno local cobren entre 35.000 e 50.000 euros anuais por traballar no Gabinete de Alcaldía, con salarios que, segundo afirma, superan significativamente os do persoal funcionario.

O portavoz lembra que o rexeitamento do BNG ás retribucións aprobadas polo Goberno municipal non é novo. A formación xa votou en contra dos salarios fixados no pleno de organización ao comezo do actual mandato, en 2023, e mantivo a mesma posición no anterior.

Igrexas contrapón a súa proposta aos privilexios económicos que, ao seu xuízo, alimentan a distancia entre a cidadanía e as institucións. «Fronte aos discursos da antipolítica e que só alentan a desafección cidadá e a desconfianza nas institucións democráticas, o BNG defendemos que a política non pode ser tratada como unha profesión, nin un modo de vida. É un espazo para a participación democrática e iso é incompatíbel con privilexios económicos», conclúe

OuTraS NoVaS

• 
  Luisa Sánchez exige a Caballero que dé explicaciones y pida perdón por la condena de Abrir Vigo al Mar (Vídeo)
• 
  O BNG oponse á suba do 5,5% dos salarios dos cargos electos que propón o goberno municipal
• 
  Galicia perde emprego en outubro mentres España bate récord de afiliación á Seguridade Social
• 
  Los estadounidenses no aguantan ni dos años a la derecha extrema
• 
  El Concello tendrá que pagar 4,58 millones al Puerto por incumplir su obligación con ‘Abrir Vigo al Mar’