O 2º tenente de alcalde asegurou que estaba «noutras ocupacións»
O Bloque Nacionalista Galego denuncia a ausencia “inxustificada” do alcalde de Vigo, Abel Caballero, na sesión do Pleno municipal celebrada este mércores.
Xabier P. Igrexas, concelleiro do BNG, vén de rexistrar un escrito para esixir explicacións a esta ausencia, que non foi comunicada nin motivada previamente, como é preceptivo segundo o Regulamento Orgánico do Pleno (ROP), e polo relevo na presidencia por parte do segundo tenente de alcalde, Javier Pardo, en lugar da primeira tenente de alcalde, Carmela Silva, como marca o regulamento.
«Outras ocupacións»
Ante unha cuestión de orde formulada polo concelleiro do Bloque a presidencia do Pleno alegou que a ausencia estaba motivada xenericamente “noutras ocupacións” que impedían asistir ao rexedor.
Igrexas cualificou esta ausencia como “unha inaceptábel falla de respeito ao Pleno da Corporación Municipal como máximo organismo democrático e representativo da vontade popular das viguesas e dos vigueses”.
