A. Buendía | vigoalminuto
A Xunta Electoral Provincial de Pontevedra considera que Alfonso Rueda vulnerou a lei electoral durante a súa visita ás obras de vivenda pública de San Paio de Navia, en Vigo, o pasado 14 de outubro. O organismo entende que o presidente aproveitou un acto institucional para difundir mensaxes de promoción da xestión do Goberno galego e ordena retirar a información publicada na web oficial e nas demais canles institucionais nun prazo máximo de 24 horas.
A resolución chega despois da denuncia presentada polo PSdeG-PSOE da provincia de Pontevedra, que cuestionou tanto a visita de Rueda ás promocións residenciais como o contido da comunicación difundida pola Xunta. Os socialistas consideraban que o Executivo autonómico utilizara recursos institucionais para poñer en valor a súa política de vivenda nun período no que a normativa electoral obriga os poderes públicos a manter a neutralidade.
A Xunta Electoral dálles a razón neste punto e conclúe que a actuación incumpriu o artigo 50.2 da Lei orgánica do réxime electoral xeral (LOREG), que prohibe durante o período electoral os actos organizados ou financiados polos poderes públicos que conteñan referencias ás súas realizacións ou logros.
«Non se limitou a informar con neutralidade»
O organismo electoral cuestiona especialmente o contido da nota de prensa difundida polo Goberno galego. O propio titular da comunicación destacaba «a aposta da Xunta» pola ampliación da oferta de vivenda pública e incluía referencias ás actuacións autonómicas en marcha.
A resolución considera que a publicación foi máis alá da información sobre o funcionamento dun servizo público. «Non se limitou a informar con neutralidade», sinala, ao entender que incorporaba referencias aos logros e ás actuacións da Administración autonómica.
As alegacións presentadas por Rueda tampouco conseguiron modificar o criterio da Xunta Electoral. O organismo lembra que, durante o período electoral, abonda con que un acto organizado ou financiado por un poder público aluda ás súas realizacións ou logros para que poida producirse unha vulneración da normativa, mesmo cando non exista unha petición expresa de voto.
A resolución lembra, ademais, que esta obriga de neutralidade afecta a todas as administracións públicas, con independencia do ámbito territorial das eleccións convocadas. Para iso, remítese aos criterios establecidos pola Xunta Electoral Central durante o proceso electoral de 2023 en relación con actuacións de presidentes, voceiros e gobernos autonómicos.
Advertencia ante unha posible reincidencia
A Xunta Electoral ordena retirar a publicación institucional nun prazo de 24 horas e require expresamente a Alfonso Rueda que se absteña de organizar ou difundir novos actos e comunicacións institucionais que poidan vulnerar a lexislación electoral.
O organismo non abre nesta ocasión un expediente sancionador, pero deixa unha advertencia expresa ao presidente galego: unha eventual reincidencia podería dar lugar á incoación dun procedemento deste tipo.
A resolución non supón, polo tanto, a imposición dunha multa a Rueda, senón unha declaración de vulneración da normativa electoral acompañada da orde de retirada da comunicación e dun requirimento para evitar que se repitan actuacións similares.
Contra esta decisión cabe presentar recurso ante a Xunta Electoral Central.
OuTraS NoVaS
- A Xunta Electoral advirte a Rueda por utilizar unha visita a Vigo para facer propaganda da súa xestión
- Vigo pierde población en verano, pese al turismo: nos vamos de vacaciones fuera de la ciudad
- Detenido tras robar en un bar de A Guarda, mientras disfrutaba de un permiso penitenciario
- Una nueva competidora de la sardina aparece por primera vez en Galicia
- Oficial y Caballero
