Centos de persoas percorreron hoxe as rúas do Porriño nunha manifestación de apoio ao persoal de Servicarne, autónomos e autónomas dependentes da empresa de procesados cárnicos Frigolouro, que reclaman unhas condicións laborais dignas.
Convocada pola CIG, os delegados sindicais celebraron unha asamblea antes de saír á rúa para explicar a situación que se está a vivir na empresa, con traballadores como “falsos autónomos, xa que a situación vai máis alá dos autónomos dependentes”, xa que traballan en exclusiva para o Frigolouro, empresa do grupo Coren “que foi destruíndo emprego estable ao longo destes anos para entregarllo a unha subcontrata”. Así, o cadro de persoal de Frigolouro pasou de 600 traballadores a 360, mentres que os empregados de Servicarne xa son 224.
Condicións laborais precarias
O sindicato denunciou que as condicións laborais destes traballadores son máis que precarias, xa que non teñen horario de traballo nin un salario fixo senón que cobran por hora, están sometidos a ritmos de produción “salvaxes que provocan enfermidades profesionais que non lles son recoñecidas”, non teñen dereito a vacacións nin a prestacións por baixa laboral ou accidente de traballo e están suxeitos a posibles sancións de ata 300 euros.
Ao mesmo tempo, a CIG lembrou que outra das reivindicacións do persoal pasa pola readmisión dos cinco compañeiros despedidos despois de participar na folga e nas mobilizacións.
