Comarcas

O Porriño recupera a emoción de ir ao cine sen saír da vila

O novo Cine Municipal abrirá o 5 de decembro cun ciclo de trece películas gratuítas durante o Nadal

A. Buendía | vigoalminuto

Ir ao cine sen ter que saír do Porriño volverá ser posible. A vila recupera unha parte da súa historia coa apertura do novo Cine Municipal, que comezará a funcionar o próximo 5 de decembro cunha programación especial de Nadal. Serán trece películas ao longo de seis fins de semana, todas de balde ata o 10 de xaneiro.

A iniciativa permitirá recuperar unha oferta cultural que durante décadas formou parte da vida cotiá do municipio. Para varias xeracións de porriñeses, ir ao Carrera, ao Diz, ao Capitol, ao Roxy ou ao Palacios era moito máis que ver unha película: era un plan de fin de semana, unha cita cos amigos ou unha tarde en familia. Aquelas salas desapareceron, pero os seus nomes seguen vivos na memoria colectiva da vila.

O novo espazo municipal pretende recuperar parte daquela actividade e ofrecer unha alternativa de lecer sen necesidade de desprazarse a outras localidades. O alcalde, Alejandro Lorenzo, presentou a programación inaugural e subliñou especialmente a posibilidade de que os máis pequenos descubran a experiencia de acudir ao cine no seu propio municipio.

«Queremos que este Nadal sexa especial para moitas familias do Porriño. Que os nenos poidan vivir a ilusión de ir ao cine no seu propio pobo, que os mozos teñan unha nova alternativa de lecer e que os nosos maiores poidan recuperar aqueles recordos de cando ir ao cine era todo un acontecemento», sinalou.


Trece películas para abrir as portas

O ciclo Cine de Nadal 2026-2027 arrancará a fin de semana do 5 e 6 de decembro con Superthings, Rondallas e O corno. Os días 12 e 13 será a quenda de Mascotas al rescate e La bola negra.

A programación continuará o 19 e 20 de decembro con Los guardianes del diente mágico e Kiro. Na última fin de semana do ano proxectaranse Ratones al ataque: Operación Navidad e El ser querido, os días 26 e 27.

Xa en xaneiro, os días 2 e 3, chegarán La oveja Shaun: Misión Calabaza e Leones en invierno. O ciclo pecharase o 9 e 10 de xaneiro con El rey de reyes e El mal padre.

As sesións serán os sábados e domingos ás 17.00 e ás 19.00 horas, con pases adicionais nalgunhas xornadas ás 21.30 ou ás 22.00 horas. Durante todo o ciclo inaugural non haberá que pagar entrada.

O Concello busca así que a veciñanza coñeza a sala e se anime a incorporala aos seus plans durante as festas. A proposta combina películas dirixidas ao público infantil e familiar con títulos destinados aos espectadores adultos.


Estreas a seis euros durante todo o ano

O 10 de xaneiro rematará a gratuidade vinculada á programación especial de Nadal, pero o Cine Municipal continuará aberto. A partir dese momento, as películas de estrea terán un prezo de 6€ e a carteleira incluirá tamén proxeccións gratuítas.

A intención do Concello é manter unha actividade cinematográfica estable e evitar que a nova instalación quede reducida a unha proposta puntual das festas. O obxectivo é recuperar o costume de acudir ao cine no propio municipio e ampliar as opcións culturais para todas as idades.

«Non queremos que o cine sexa unha actividade só do Nadal. Abrimos cun programa gratuíto para que a veciñanza coñeza a sala, pero a intención é que poidamos seguir gozando das estreas aquí, no Porriño, cunha entrada a un prezo accesible», explica o alcalde.


OuTraS NoVaS


Te podría interesar

Vigo al minuto
Resumen de privacidad

Esta web utiliza cookies para que podamos ofrecerte la mejor experiencia de usuario posible. La información de las cookies se almacena en tu navegador y realiza funciones tales como reconocerte cuando vuelves a nuestra web o ayudar a nuestro equipo a comprender qué secciones de la web encuentras más interesantes y útiles.