O Concello do Porriño vén de sacar a licitación as obras de renovación dos parques infantís e equipamentos deportivos de Torneiros, cun orzamento total de 124.999,99 euros (IVE incluído), nunha actuación que transformará de forma significativa as áreas de lecer das fases I, II e III desta zona residencial.
Os traballos teñen como obxectivo modernizar os espazos públicos, mellorar a seguridade e crear contornos máis atractivos para a veciñanza, especialmente para a infancia.
Actuacións por fases: melloras progresivas en todo o barrio
Na fase I, cun investimento de 13.829,48 euros, instalarase un novo balanceador de madeira laminada e aceiro, limparase o multixogo existente e renovaranse os asentos dos columpios, incluíndo un adaptado para bebés. Ademais, colocarase un valado de madeira de 66 metros e executarase unha base de zahorra e céspede artificial nunha superficie de 175 metros cadrados, xunto coa restauración dos xogos actuais.
A fase II concentra a maior parte do investimento, con 70.234,82 euros, e suporá a creación dunha nova área de xogo de 11 por 16,5 metros con pavimento de céspede artificial. O proxecto inclúe a instalación dun multixogo, unha mesa de xogos con bancos e un estanque ornamental accesible de 38 metros cadrados con iluminación LED subacuática.
Neste espazo tamén se incorporará un banco corrido de granito do Porriño, así como bancadas e xardineiras elaboradas con este material, co obxectivo de reforzar a identidade local e lograr unha integración estética harmoniosa.
Ademais, renovarase toda a xardinería do contorno con especies arbustivas e tapizantes adaptadas ao clima atlántico, nun deseño de baixo mantemento que busca crear un espazo verde confortable e integrado coa contorna.
Na fase III, instalarase unha casiña infantil pensada para o desfrute da cativada, completando así a renovación das áreas de lecer.
«Unha aposta pola calidade de vida en Torneiros«
O alcalde do Porriño, Alejandro Lorenzo, destacou que esta actuación “non é só unha reforma estética, senón unha aposta decidida pola calidade de vida e a seguridade das familias de Torneiros”.
Lorenzo puxo tamén en valor o uso de materiais propios da zona, como o granito Rosa Porriño, que contribúe a reforzar a identidade do municipio nos espazos públicos.
Financiamento europeo e prazos de execución
As obras deberán estar rematadas antes do 30 de xuño, ao estar financiadas pola Unión Europea a través dos fondos NextGenerationEU, no marco do Plan de Recuperación, Transformación e Resiliencia e a colaboración da Xunta de Galicia.
Outras novas
- El marisco que consumes contiene microfibras: un estudio detecta microplásticos en mejillones, ostras y almejas
- Caballero vuelve a denunciar que Xunta y Diputación quieren cerrar Peinador
- Así cambiará Rosalía de Castro en Vigo: más espacio peatonal, sombra y menos tráfico
- O Porriño transformará Torneiros: novos parques, estanque e zonas verdes
- El Casco Vello de Vigo recuperará un inmueble emblemático de la Rúa Real, para vivienda protegida
