Unha renuncia forzada pola mobilización do persoal
A empresa Óbolo, concesionaria do Servizo de Axuda no Fogar (SAF) do Concello de Ponteareas, renunciou finalmente á xestión do servizo tras meses de conflito laboral e 68 xornadas de folga protagonizadas polas traballadoras. O pleno municipal aprobou por unanimidade, este luns, a solicitude da compañía para abandonar voluntariamente o contrato, escudándose en que o prezo pactado facía inviábel a prestación do servizo.
Desde a CIG, central sindical maioritaria no conflito, considérase que a saída da empresa chega tarde e lamentan que o Goberno local, presidido por Nava Castro, non optase pola rescisión do contrato por incumprimento, unha vía que, segundo defenden, estaba plenamente xustificada polos feitos acreditados durante estes meses.
Graves incumprimentos e presións ás traballadoras
O sindicato lembra que a renuncia de Óbolo non se pode entender sen a loita incansábel do persoal do SAF, que sostivo mobilizacións diarias malia as presións sufridas. Durante o conflito, as traballadoras denunciaron impagos, incumprimentos contractuais e vulneracións de dereitos laborais, así como unha actitude hostil por parte da empresa e dos responsábeis municipais.
A CIG asegura que tiveron que soportar “mentiras, falsidades, presións, ameazas e mesmo agresións físicas”. Entre os episodios máis graves, unha das empregadas chegou a presentar denuncia ante a Garda Civil tras ser golpeada en varias ocasións coa contra de madeira dunha ventá mentres participaba nun peche no salón de plenos do Concello.
Un conflito que deu resultados
Malia todo, co apoio da CIG e dunha parte significativa da veciñanza de Ponteareas, o persoal conseguiu resistir. Primeiro, forzaron á empresa a regularizar o pago das nóminas e a comprometerse a cumprir as condicións esenciais do contrato. Finalmente, lograron provocar a renuncia da concesionaria, comunicada a mediados deste mes e ratificada polo pleno municipal.
A votación celebrouse coa presenza dun grupo de traballadoras do SAF, que celebraron unha decisión agardada durante moito tempo e que marca un punto de inflexión nun conflito laboral que se converteu nun referente de resistencia no sector dos coidados.
Outras novas
- Suspendido o acto de inicio de VigoCultura, previsto para este venres
- Ábalos renuncia a su escaño, desde la cárcel
- ‘Los lunes al sol’ llega a Vigo, en su versión teatral más aclamada
- Playback está de volta: as túas historias cobran vida sobre o escenario
- El BNG exige a Abanca la cesión de viviendas vacías en Vigo
Un reto aberto para o Concello
Desde a CIG insisten agora en que o Concello debe garantir un novo modelo de xestión do SAF que respecte os dereitos laborais e a calidade do servizo, evitando repetir unha concesión que, lembran, rematou tras meses de conflito, desgaste social e sufrimento das traballadoras.
