O BNG vén de solicitar a convocatoria urxente dun Pleno extraordinario do Parlamento de Galicia no que compareza o conselleiro de Sanidade. A petición faise diante da “gravísima situación de colapso na que se atopa a Atención Primaria, en especial na área sanitaria de Vigo”.
Seis centros de saúde de Vigo xa non atenden pacientes
Neste sentido, a portavoz de Sanidade do Bloque, Montserrat Prado, cualifica de “inaceptable” a decisión de suspender a actividade asistencial e deixala reducida a casos COVID e urxencias en 14 centros de saúde da área sanitaria viguesa- 6 deles na propia cidade-.
Risco para persoas con outras patoloxías
Prado subliña que esta decisión “deixa aos profesionais vendidos” e sen mans para atender tanta demanda. Ademáis, supón “un grave risco para a saúde das persoas con outras patoloxías“, que quedan sen atender.
Por último, aumenta “a desesperación de profesionais” , transferindo a presión a PACs e Urxencias hospitalarias, que xa están ao límite.
Consecuencia dos “recortes” na Sanidade
“O BNG ten moi claro que esta dramática situación é consecuencia de 12 anos de recortes e de non tomar medidas“. Son 12 anos de “desestimento do PP á hora de actuar”, sinala a deputada.
Para Prado, tal e como denucniaron tamén os profesionais, “a improvisación e a falta de planificación que ten caracterizado ao Goberno de Núñez Feixóo durante toda a pandemia volve a poñerse de manifesto”.
A saúde das persoas non pode agardar
A deputada nacionalista considera urxente a comparecencia do conselleiro Julio García Comesaña para que dea conta “de cal é a alternativa que lle dá á cidadanía para ser atendida porque -recalca- a saúde das persoas non pode agardar”.
