A portavoz municipal do BNG, Iolanda Veloso, reclamou hoxe á Deputación de Pontevedra que solucione «xa» a «discriminación de nenos e nenas con diversidade funcional» que na súa opinión están plasmadas nas bases dos campamentos que organiza este organismo. «Que se calen e deixen de ofender ás familias afectadas», esixiu.
A tamén deputada provincial asegurou que hai «multitude de familias ofendidas debido a esta exclusión» e que calquera pode comprobar vendo a páxina web da Deputación provincial. «Dicir que os nenos e nenas con discapacidade non poden ir ás tendas de campaña que se utilizan nos campamentos son escusas de mal pagador e ofensivas para moitas familias», sinalou Veloso.
A portavoz municipal nacionalista instou á institución provincial a «que deixe de xustificar o inxustificable, porque se os nenos e nenas non poden ir aos campamentos de A Lanzada ou de Príncipe Felipe é simplemente porque non os deixan, tal e como pon claramente na convocatoria».
Sobre as chamadas telefónicas das persoas interesadas como método para poder participar nos campamentos deste organismo, Veloso destacou que «só fai confirmar o que pensa o BNG sobre a Deputación de Pontevedra, que é unha institución caciquil ao servizo do PP».
