Redacción | Vigo Al Minuto
O Tribunal Superior de Xustiza de Galicia (TSXG) condenou o Sergas por vulnerar os dereitos fundamentais á integridade física e moral dun traballador da área sanitaria de Vigo e fixou unha indemnización de 38.497,80 euros. A Sala do Social considera acreditado o incumprimento das obrigas legais e regulamentarias en materia de prevención de riscos laborais, concretamente no ámbito dos riscos psicosociais.
O empregado incorporouse en 2019 como persoal fixo do Grupo de Xestión da área sanitaria de Vigo. Segundo o relato da CIG-Saúde, desde 2020 denunciou ante os seus superiores unha situación de acoso laboral que se prolongou durante anos.
Así, o traballador repartía a súa xornada entre a Dirección de Atención Primaria e a Dirección de Recursos Humanos. Foi nesta última onde, segundo a organización sindical, comezaron os conflitos, con comentarios despectivos, cambios na asignación das tarefas e falta dun espazo de traballo definido.
A situación derivou, sempre segundo a CIG-Saúde, en modificacións e redefinicións constantes das súas funcións. Posteriormente, a Dirección de Recursos Humanos teríalle retirado o acceso ás aplicacións informáticas necesarias para desenvolver o seu traballo e tamén á información que precisaba para desempeñalo.
A organización sindical asegura que esta situación chegou a ter consecuencias nos centros de saúde. Segundo a CIG, varios profesionais de Atención Primaria non puideron completar a súa alta nos sistemas informáticos, o que dificultou o seu acceso ás listaxes de traballo e acabou provocando problemas organizativos e asistenciais.
Un conflito coñecido desde 2021
A situación foi comunicada en diferentes ocasións á Xerencia e á Dirección de Recursos Humanos. O traballador, apoiado pola CIG, participou durante meses en reunións destinadas a intentar resolver o conflito, pero, segundo o sindicato, a situación de hostilidade mantívose.
O empregado chegou a solicitar asistencia sanitaria e permaneceu de baixa médica en varias ocasións, segundo a información facilitada pola central sindical.
En xullo de 2023, ante a continuidade do conflito, a delegada de prevención da CIG solicitou a apertura do procedemento interno do Sergas para investigar unha posible situación de acoso laboral. A documentación presentada superaba as 200 páxinas.
A comisión encargada da investigación concluíu que non quedaba acreditada a existencia de acoso laboral, aínda que propuxo medidas correctoras destinadas a mellorar o clima de traballo.
A investigación da propia Dirección de Recursos Humanos
Un dos puntos cuestionados pola CIG foi quen se encargou de tramitar a investigación interna. O procedemento foi asumido pola propia Dirección de Recursos Humanos do Sergas en Vigo, na que se integraban varias das persoas sinaladas polo traballador, entre elas dous mandos intermedios e unha directiva.
A organización sindical pediu que a investigación fose trasladada aos Servizos Centrais do Sergas para garantir a súa imparcialidade, unha petición que, segundo a CIG, foi rexeitada.
Finalmente, o traballador optou por acudir aos tribunais para reclamar o cumprimento das obrigas legais en materia de prevención de riscos laborais.
A resolución do TSXG conclúe agora que se produciu unha vulneración de dereitos fundamentais relacionada coa protección fronte aos riscos psicosociais e condena o Sergas ao pagamento dunha indemnización de 38.497,80 euros.
A CIG reclama responsabilidades
A CIG-Saúde cualificou a resolución de “éxito moral” para o traballador e considerou que a sentenza permite poñer fin a unha situación que, ao seu xuízo, era evitable e acabou afectando á súa saúde.
O sindicato considera especialmente grave que a Xerencia e a Dirección de Recursos Humanos coñecesen o conflito desde 2021 e sostén que non adoptaron medidas eficaces para resolvelo.
Por este motivo, reclama que se depuren responsabilidades entre as persoas que, segundo a súa valoración, permitiron que a situación se prolongase. A central sindical subliña ademais que a indemnización terá que ser aboada con fondos públicos.
OuTraS NoVaS
- O TSXG condena o Sergas por vulnerar os dereitos fundamentais dun traballador
- El alcalde anuncia que Vigo reserva casi 400.000€ para la Cabalgata de Reyes y la megafonía de Navidad
- La Movida viguesa vuelve este sábado con una gran noche dedicada a Golpes Bajos
- Vigo e Nigrán entran en ‘medidas de prealerta’ ante o empeoramento da situación en Zamáns
- Empiezan a funcionar las Zonas de Bajas Emisiones: quién puede entrar, qué excepciones hay y cuándo empezarán las multas
