O Concello de Nigrán dará un novo uso aos antigos cines municipais do Centro Comercial Siglo XXI da Ramallosa coa súa transformación nun novo espazo cultural polivalente que combinará un auditorio e unha sala de proxeccións cinematográficas.
Este proxecto, deseñado polo arquitecto nigranés Severo Fernández Castro, sairá a licitación a vindeira semana cun orzamento base de 555.290 euros e estará financiado con fondos europeos procedentes do Plan de Actuación Integrada (PAI) de O Val Miñor, unha iniciativa conxunta dos concellos de Nigrán, Baiona e Gondomar que conseguiu captar 4,4 millóns de euros.
241 persoas
A actuación permitirá converter as dúas salas existentes nun complexo cultural con capacidade para 241 persoas. Por unha banda, habilitarase un auditorio polivalente con 106 prazas, tres delas adaptadas para persoas con mobilidade reducida, preparado para acoller representacións, conferencias, presentacións, actos municipais e diferentes actividades culturais. O espazo contará con escenario, camerino, almacén e cabina de control de son.
A segunda sala manterá o uso cinematográfico e disporá de 135 localidades, catro delas adaptadas, ademais dun espazo específico para o control audiovisual.
O alcalde de Nigrán, Juan González, salienta que a actuación permitirá gañar “un espazo cultural moi necesario no municipio e único na comarca”. González pon en valor a oportunidade que supuxo a adquisición do inmoble e a posterior chegada dos fondos europeos para a súa rehabilitación.
Como informara vigoalminuto, o Concello adquiriu estes antigos cines por 74.415 euros tras permanecer pechados desde 2014. Desde o pasado mes de outubro, o consistorio xa emprega unha das salas para programación cinematográfica, recuperando a actividade coa proxección de La isla mínima, a mesma película coa que o complexo pechara as súas portas máis dunha década antes.
Reforma a fondo
A reforma integral incluirá a renovación da climatización, ventilación, instalación eléctrica, iluminación e sistemas de protección contra incendios. Tamén se mellorará o illamento e acondicionamento acústico, adaptaranse accesos, percorridos e aseos e rehabilitaranse as butacas existentes, incluíndo o seu retapizado e redistribución.
Ademais, o proxecto contempla deixar preparadas as instalacións para futuros sistemas de iluminación e son escénicos, así como para a incorporación dun sistema de proxección dixital.
A intervención incluirá tamén unha renovación exterior do espazo, cun novo revestimento da fachada cara ao interior do Centro Comercial mediante aluminio microperforado.
O Concello considera que a actuación reforzará o papel da Ramallosa como principal núcleo urbano de Nigrán, achegando a esta zona máis actividade cultural e aproveitando tamén a existencia do aparcadoiro municipal gratuíto situado nas proximidades.
OUtraS NOvaS
- Nigrán converterá os antigos cines da Ramallosa nun espazo con auditorio e sala de proxeccións
- Hallan muerta a Carmen López Rebolo, la joven desaparecida en Lugo el pasado 21 de julio
- “No estaba preparado”: la joven de Vigo que acabó bailando con Chayanne
- Detenido en Cangas un hombre acusado de cuatro robos con violencia a personas vulnerables
- Sinsal transforma el puerto de Vigo en un escenario único con conciertos entre naves y bloques de granito
