A Xunta pon en marcha este mércores unha nova campaña de concienciación sobre o uso responsable dos servizos sanitarios coa que pretende fomentar hábitos que contribúan a mellorar o funcionamento da sanidade pública galega. Baixo o lema «Protexamos aos que nos protexen», a iniciativa estará presente en medios de comunicación e redes sociais e dirixirase tanto á cidadanía como aos profesionais sanitarios.
A campaña foi presentada este martes polo conselleiro de Sanidade, quen incidiu na importancia de determinadas actuacións individuais para mellorar a eficiencia do sistema, como acudir ás citas programadas ou cancelalas con antelación cando non se poida asistir.
Máis de 1,1 millóns de consultas perdidas
Durante a presentación, o titular de Sanidade puxo cifras ao impacto do absentismo nas consultas do Servizo Galego de Saúde (Sergas). Segundo detallou, ao longo de 2025 rexistráronse 864.000 consultas de atención primaria ás que os pacientes non acudiron, o que representa o 3,2% do total. No ámbito hospitalario, 248.000 persoas non asistiron ás súas citas co especialista, un 5,69% das programadas.
En conxunto, o sistema sanitario galego contabilizou máis de 1,1 millóns de consultas perdidas por incomparecencia dos usuarios durante o pasado ano.
«Pequenas accións individuais poden ter un impacto moi positivo no conxunto do sistema», subliñou o conselleiro, quen defendeu a necesidade de reforzar a corresponsabilidade cidadá para optimizar os recursos dispoñibles.
Mensaxes para reducir a presión asistencial
A iniciativa inclúe material gráfico, anuncios para televisión, cuñas de radio e contidos audiovisuais para redes sociais. A campaña aposta por mensaxes en positivo destinadas a promover un uso adecuado dos servizos sanitarios.
Entre os exemplos difundidos figuran recomendacións como acudir ás urxencias só cando sexa necesario ou cancelar as citas ás que non se poida asistir para facilitar que outros pacientes poidan ser atendidos antes.
Segundo explicou Sanidade, esta actuación responde a peticións formuladas por distintos colectivos profesionais e forma parte dos compromisos adquiridos recentemente cos representantes dos traballadores do sistema sanitario. Ademais, a Consellería informou previamente aos Colexios Oficiais de Médicos de Galicia sobre a posta en marcha da campaña.
Sanidade traballa para facilitar a cancelación das citas hospitalarias
Durante a comparecencia tamén se avanzou que a Xunta está a traballar en novos mecanismos que permitan simplificar a anulación das consultas hospitalarias.
Actualmente, as citas con especialistas poden cancelarse por vía telefónica, pero non a través da aplicación Sergas Móbil, como xa sucede na Atención Primaria. O departamento autonómico estuda incorporar esta funcionalidade para facilitar os trámites aos pacientes e reducir o número de ausencias.
Coincidencia?… a campaña chega na véspera das protestas polas listas de espera
A posta en marcha desta iniciativa prodúcese nun contexto especialmente sensible para a sanidade pública galega. A campaña comezará apenas 24 horas antes das concentracións convocadas diante de hospitais de toda Galicia para denunciar o incremento das listas de espera para intervencións cirúrxicas, consultas con especialistas, probas diagnósticas e atención primaria.
As mobilizacións están promovidas por colectivos en defensa da sanidade pública, que consideran que os tempos de espera continúan sendo un dos principais problemas do sistema sanitario galego.
Neste escenario, a Xunta centra a súa mensaxe na necesidade dun uso máis eficiente dos recursos dispoñibles, mentres as plataformas convocantes reclaman máis investimento e reforzo de persoal para reducir a demora asistencial.
Outras novas
- A Xunta apela á ‘responsabilidade dos pacientes’ na véspera das protestas polas listas de espera
- Marisquiño recupera el espectacular MTB Downtown, que volverá a transformar el Casco Vello
- Alerta da presión sobre o leite: denuncian unha caída de prezos que afoga ás granxas galegas
- El Gobierno confirma que la Biblioteca del Estado sigue pendiente de la cesión de los terrenos por parte del Concello
- O Porriño facilita aos peregrinos a expedición de credenciais do Camiño Portugués
