O Concello do Porriño informa de que, desde hoxe, as persoas que desexen iniciar o seu percorrido polo Camiño Portugués a Santiago poderán adquirir no municipio as credenciais oficiais necesarias para realizar a ruta xacobea.
As credenciais estarán dispoñibles na oficina de VIDE, situada na rúa Ramón González, o que facilita que os milleiros de peregrinos que cada ano escollen O Porriño como punto de partida poidan iniciar a súa experiencia con toda a documentación necesaria para obter posteriormente a Compostela.
Colaboración parroquial e mellora do servizo
O Concello agradece especialmente a colaboración e as xestións realizadas polo párroco de Santa María do Porriño, Don Ángel, que fixeron posible a posta en marcha deste servizo no municipio.
Coa incorporación deste punto de expedición, búscase mellorar a atención aos peregrinos e reforzar a imaxe do municipio como unha das principais portas de entrada ao Camiño Portugués.
O Camiño Portugués, en crecemento
O Camiño Portugués continúa consolidándose como unha das rutas xacobeas máis transitadas. Durante o ano 2025 rexistrou un total de 100.831 peregrinos, dos cales 3.646 iniciaron o seu percorrido no Porriño, completando os 100 quilómetros mínimos esixidos para obter a Compostela.
Co obxectivo de mellorar a acollida, cada credencial entregarase acompañada dun estuche conmemorativo cos símbolos oficiais do Camiño de Santiago, así como unha mensaxe de benvida e bo camiño.
O alcalde do Porriño, Alejandro Lorenzo, salientou que o municipio “é un punto de partida elixido por milleiros de peregrinos de todo o mundo” e subliñou a vontade de ofrecer unha experiencia inicial “da mellor maneira posible, levando un recordo da nosa hospitalidade e da nosa vinculación histórica co Camiño de Santiago”.
Pola súa banda, a concelleira de Turismo, Vanessa Ucha, sinalou que esta medida responde a unha demanda necesaria para mellorar os servizos turísticos e recalcou que “O Porriño é Camiño, pero tamén é destino”.
Impulso ao turismo xacobeo
Con esta iniciativa, o Concello do Porriño continúa reforzando a atención ás persoas peregrinas e a promoción do Camiño Portugués como un dos principais recursos turísticos e culturais do municipio.
Outras novas
- O Porriño facilita aos peregrinos a expedición de credenciais do Camiño Portugués
- Junts reta a Feijóo a que negocie la moción de censura con Puigdemont, en Waterloo
- España alcanza un récord histórico de empleo: supera los 22,3 millones de afiliados
- Arrestado un implicado en la estafa de 94.000€ mediante el falso mensaje de ‘una hija en apuros’
- Freire construye en Vigo el mayor buque de transporte de salmón del mundo
