O Concello de Gondomar impulsará un proxecto integral de adecuación, conservación e mellora do cemiterio municipal cun investimento de 300.000 euros, unha actuación coa que pretende modernizar as instalacións, reforzar a súa conservación e mellorar as condicións dun espazo considerado esencial para a veciñanza.
A intervención contempla distintas actuacións destinadas a optimizar tanto as infraestruturas existentes como os espazos comúns do recinto, coa incorporación de medidas orientadas á eficiencia enerxética, a redución do consumo eléctrico e a humanización da contorna.
Segundo explicou o alcalde de Gondomar, Paco Ferreira, trátase dunha actuación que forma parte da liña de mellora e ampliación dos cemiterios municipais desenvolvida polo goberno local nos últimos anos.
Entre os traballos previstos figuran:
- reposición do empedrado
- pavimentación de distintas zonas
- creación e mellora de espazos axardinados
- instalación dun novo sistema de iluminación eficiente de baixo consumo
- posta en marcha dunha nova rede de recollida de pluviais para evitar filtracións e humidade
- tamén se acometerán actuacións de rehabilitación nos nichos existentes para reforzar a seguridade e conservación do recinto
Obras por fases para garantir o funcionamento do recinto
As obras terán un prazo estimado de execución de catro meses e desenvolveranse por fases co obxectivo de garantir o funcionamento habitual do cemiterio durante o período de actuación.
O Concello subliña que este proxecto forma parte dunha estratexia máis ampla de modernización dos servizos públicos municipais e de mellora das infraestruturas locais.
Melloras realizadas noutros cemiterios municipais
O goberno local destaca que esta actuación súmase a outros proxectos desenvolvidos nos últimos anos nas distintas parroquias do municipio.
Entre as intervencións realizadas figuran:
- ampliacións de nichos
- melloras de accesibilidade
- renovación de pavimentos e muros
- actuacións de mantemento e conservación
- instalación de iluminación LED e acondicionamento de espazos verdes
- proxectos de ampliación e modernización noutros recintos municipais
Durante a presentación do proxecto, Paco Ferreira tamén quixo destacar o valor emocional e simbólico destes espazos. «Estamos falando dun lugar cargado de memoria, de recordos e de emocións para moitísimas familias de Gondomar. Merece estar coidado e á altura do que representa para o noso pobo», sinalou.
Outras novas
- Gondomar investirá 300.000 euros na transformación e mellora do cemiterio municipal
- El alcalde culpa a PP, BNG, Xunta y Federación, pese a que no hay proyecto para ampliar Tribuna
- El BNG pide a Caballero que descarte el “macrotúnel” hasta Torrecedeira y alerta de otros 20 millones de coste
- El minibús autónomo de la Universidade de Vigo amplía su recorrido y supera ya los 800 usuarios
- Torneiros cambiará por completo: luz LED, novas zonas peonís e un parque acuático
