Fito&Fitipaldis, en Vigo coa súa xira 'Teatros e Auditorios'

As entradas á venda o luns, 1 de agosto

A Xunta, a través da programación musical do Xacobeo 21-22, traerá a Vigo o vindeiro mes de outubro ao grupo Fito & Fitipaldis coa súa nova xira “Teatros e Auditorios” tras completar este mes de xullo o tour do seu último disco.

Así, a banda liderada por Fito Cabrales actuará no Auditorio Mar de Vigo o 28 de outubro e as entradas estarán á venda o próximo luns, 1 de agosto, a través da plataforma Teuticket.

‘Cada vez cadáver’

Despois de pechar a xira estatal máis multitudinaria, a banda anunciou este xoves un novo formato que achegará ao público a un ambiente máis íntimo en teatros e auditorios, no que se poderán escoitar cancións do seu último disco “Cada vez cadáver” e os clásicos da banda.

Na presentación este xoves da xira, Fito Cabrales anunciou que incorpora aos Fitipaldis a Jorge Arribas e Diego Galaz de Fetén Fetén que, xunto a Carlos Raya, Javier Alzola, “Boli” Climent e “Coki” Giménez, completarán a banda que percorrerá durante o outono e inverno algúns dos teatros e auditorios do país.

Muse, C.Tangana, Festival Latitudes…

Ademais deste concerto de Fito & Fitipaldis, a Xunta está a desenvolver unha ampla programación musical na cidade a través do Xacobeo 21-22. Así, o trío británico Muse estará o 8 de setembro no Estadio de Balaídos para ofrecer unha das tres datas que ten reservadas en España.

Co patrocinio do Xacobeo tamén estarán en Vigo C. Tangana (23 de agosto no Porto de Vigo) e xa estivo Rufus Wainwright (2 de xullo en Afundación). Ademais, están en marcha outros dous ciclos (Xacobeo Vigo e Xacobeo Importa) e un festival (Latitudes) para conformar unha oferta que chegará ata os vinte concertos na cidade.

Área Metropolitana

No que respecta á area metropolitana, o Xacobeo 21-22 leva actuacións a Mos (Morat e Tanxugueiras), O Porriño (Taburete), Redondela (M-Clan), Tui (Xoel López), A Guarda (Beret), Soutomaior (Dani Fernández), Cangas (Roi Casal), Baiona (Andrés Suárez) e Oia (Tanxugueiras).