–Este luns, día 21 de marzo, ás 10:30h. na Delegación da Xunta de Galicia en Vigo
–Co asesoramento de especialistas e técnicos do Instuto Galego da Vivenda e Solo
-‘Construíndo Fogar’ está aberto a todos os veciños de Baiona, Cangas, Fornelos de Montes, Gondomar, Moaña, Mos, Nigrán, Pazos de Borbén, O Porriño, Redondela, Salceda de Caselas, Salvaterra de Miño, Soutomaior e Vigo
Este luns, día 21, ás 10;30h. na Delegación da Xunta en Vigo (rúa Concepción Arenal, 8, planta baixa), expertos do Instituto Galego da Vivenda e Solo (IGVS), explicarán que hai que facer para optar a algunha das mais de 30 liñas de axudas e incentivos que ten en marcha o Goberno de Galicia en materia de vivenda.
‘Construindo Fogar‘
Trátase dun novo encontro informativo do plan ‘Construindo Fogar’, aberto ao público e ao que están convocados representantes dos concellos de Baiona, Cangas, Fornelos de Montes, Gondomar, Moaña, Mos, Nigrán, Pazos de Borbén, O Porriño, Redondela, Salceda de Caselas, Salvaterra de Miño, Soutomaior e Vigo.
Requisitos para optar ás axudas
Na reunión os asistentes recibirán información dos requisitos que teñen que cumprir para solicitar as axudas para vivenda; tamén poderán coñecer os trámites a realizar ante a Xunta para acceder aos incentivos dispoñibles este 2022: é dicir, tanto dos programas que xa están abertos como daqueles que se publicarán ao longo do ano.
Compra e alugueiro
Brindarase información sobre as distintas liñas de axudas para facilitar o acceso a unha vivenda en réxime de compra ou de alugueiro.
Rehabilitación de vivendas
Os especialistas do Instituto da Vivenda e Solo tamén falarán dos programas dispoñibles para a rehabilitación de vivendas en Galicia, a maioría deles, dirixidos aos particulares, e outros destinados aos concellos.
Camiños de Santiago
No encontro tamén se presentarán aqueles programas de axudas á rehabilitación supramunicipal dos Camiños de Santiago, xa que por Baiona, Mos, Nigrán, O Porriño, Redondela e Vigo discorre o Camiño Portugués, incluída a súa variante pola Costa.
Neste eido, os catro núcleos históricos da comarca situados en Baiona, Cangas e Vigo —Bouzas e Casco Vello— pódense beneficiar de forma específica da liña de incentivos exclusiva para estes ámbitos.
Animar a presentar solicitudes de axudas
A Consellería de Medio Ambiente considera fundamentais estes encontros, para dar a coñecer a existencia das liñas de subvencións dispoñibles e animar aos posibles beneficiarios a presentar unha solicitude, ofrecendo información directa, práctica e útil.
Nova oficina
Así mesmo, o encontro de Vigo servirá presentar a nova Oficina de rehabilitación de vivenda, posta en marcha recentemente pola Xunta para asesorar e dar a coñecer aos futuros beneficiarios os novos programas de axudas con fondos europeos en materia residencial.
Esta oficina xa está en funcionamento e permanece aberta de luns a venres polas mañás, en horario de 9 a 14 horas. Os interesados teñen a opción de facer consultas por teléfono, a través do número 881 045 897, o mesmo ao que hai que chamar para pedir cita previa en caso de preferir atención presencial.
