O Hospital Álvaro Cunqueiro, é a sede da reunión europea de investigación de Atención Primaria, que comezou este xoves, día 17, e que se clausurará mañá, sábado. A Área Sanitaria viguesa coordina o evento, o máis importante de Europa relacionado coa investigación nesta especialidade.
De xeito paralelo á 89ª edición da reunión da Rede Europea de Investigación en Medicina de Familia (EGPRN), realízanse as XXIII Xornadas Galegas de Medicina Familiar e Comunitaria (AGAMFEC) e a XIX Xornada da Red Española de Atención Primaria (REAP).
A coordinadora da reunión, Ana Clavería, considera que “é importante para a nosa área sanitaria que este evento se celebre en Vigo, polo nivel de investigación que hai na Atención Primaria aquí e a implicación do Instituto de Investigación Sanitaria Galicia Sur (IISGS) nela”.
A reunión está orientada á participación, con debates abertos e tempo para establecer ás bases de futuros proxectos multicéntricos e internacionais.
170 médicos de todo o mundo
O lema da reunión é “Medicina de Familia e comunidade: investigación sobre servizos de saúde, melloras de calidade e formación”. Pese a súa priorización aos procesos comunitarios, hai cabida para todo tipo de investigacións con Atención Primaria como eixo, de médicos, enfermeiras, farmacéuticos e outros investigadores.
Ao evento de Vigo asisten ao redor de 170 facultativos de case que todos os países europeos e algúns doutros continentes. No programa están incluídas 90 comunicacións, tanto en relatorios como en pósters. O 20% destas comunicacións están feitas por profesionais galegos, “o que dá idea do nivel de investigación que hai na Atención Primaria en Galicia”, suliña Clavería.
Os principais relatorios estan a cargo da doutora irlandesa Anne MacFarlane, profesora de la Universidad de Limerick, e de Jordi Varela, especialista en Medicina de Familia e experto en xestión sanitaria.
Máis de 120.000 médicos de familia europeos
A Rede Europea forma parte da Organización Mundial de Médicos de Familia. A rama rexional desta organización, WONCA Europa, é a sociedade académica e científica europea máis importante para a medicina xeral e medicina familiar. Representa a 47 organizacións membros e a máis de 120.000 médicos de familia que traballan en países europeos. Dentro dela hai varias ramas específicas, unha das cales é a EGPRN, que se dedica á investigación.
A Rede Europea de Investigación de Medicina de Familia, cuxa reunión anual celebrarase en outubro en Vigo, é unha organización de médicos de familia e outros profesionais da saúde involucrados na investigación en Atención Primaria e Medicina de Familia.
O seu obxectivo é proporcionar unha contorna adecuada para discutir e desenvolver a investigación nese nivel asistencial; fomentar e coordinar estudos multinacionais, intercambiar experiencias e desenvolver unha base científica validada para a práctica xeral.
