RGPD - Cookies
Vigo al día

@bngvigo esixe ao Goberno galego «a fin do abandono» da cidade

O concelleiro electo do BNG, Xabier P. Igrexas, esixiu «a fin da política de abandono de Vigo» que está a aplicar o Goberno galego. Igrexas dirixiu un escrito ao Delegado Territorial da Xunta en Vigo,urxindo unha rectificación e demandando que se atendan as necesidades da «principal cidade de Galicia».

Pérez Igrexas criticou a dinámica de «confrontación partidista» na que están instalados os gobernos municipal e galego e que está a supor graves prexuízos para as viguesas e os vigueses. «Levamos anos demandando a fin desta lea inútil e hoxe o que lle dicimos a Núñez Feixóo é que o seu enfrontamento con Caballero non pode ser unha coartada para desatender as necesidades da principal cidade de Galicia», explicou. O nacionalista demandou que o Goberno galego «exerza as súas competencias e responsabilidades», lembrando que en Vigo viven máis de «300 mil galegas e galegos».

O futuro edil instou o Partido Popular a «tomar boa nota dos resultados do 26M», asegurando que o desplome electoral sen precedentes dos populares en Vigo supón unha «censura rotunda» ás súas políticas. «8 de cada 10 viguesas e vigueses colleron unha papeleta diferente da do PP e dos seus parceiros do tripartito reaccionario –en alusión a C’s e Vox–», remachou.

«Atender o mandato democrático expresado nas urnas viguesas o pasado 26 de maio, esixe que a Xunta deixe de utilizar a permanente confrontación partidista co actual Goberno municipal, como coartada para non exercer as súas competencias e responsabilidades na principal urbe do noso País.», explicítase na misiva dirixida ao delegado.

20 reivindicacións

O Bloque recolle un total de 20 cuestións urxentes relativas á cidade que precisan dunha viraxe de 180º na posición adoptada pola Xunta. Entre elas que salientan o transporte metropolitano, o instituto de Navia, o centro de saúde de Bouzas, a mellora da Atención Primaria, o aumento de prazas públicas de escolas infantís, residencias de maiores e pisos asistidos. As nacionalistas piden tamén compromisos en infraestruturas como o túnel de Xulián Estevez ou o alargamento do de Beiramar.

Tamén demandan apostar polo desenvolvemento de Peinador, dentro dun sistema aeroportuario galego coordinado, o estudo para poñer en marcha unha rede de tren de proximidade (cercanías) e o reforzo do transporte marítimo de Ría.

Cese do presidente do Porto

O BNG pide de maneira expresa a destitución do actual presidente da  Autoridade Portuaria, Enrique López Veiga, pola súa “nefasta xestión”, e paralizar calquera novo proxecto de recheo na Ría de Vigo. Por derradeiro, requiren unha maior implicación da administración galega na cuestión ambiental, cun Plan de Rexeneración da Ría de Vigo e o apoio ás Comunidades de Montes para recuperar as zonas afectadas polos lumes.

También te puede interesar