O grupo municipal da Marea de Vigo sinala nunha que o tipo de negocio contido no novo espazo comercial que se está proxectando para a estación Thom Mayne, “debería estar relacionado directamente co transporte”, supoñendo dese xeito a integración entre o comercio local da zona e o propio espazo.
“A pesar de que a empresa Vialia está anunciando este novo proxecto como algo “novidoso”, na realidade tratase doutro centro comercial ao uso, exactamente igual que os demais centros Vialia que hai no resto do estado, como pode ser na estación de tren de Pontevedra, hoxe en día case abandonado”, sinalan dende o grupo municipal da Marea.
Por outra banda, para a Marea de Vigo resulta “inverosímil” que unha empresa como Auchan estea falando de creación de emprego, xa que, “día a día está demostrando ser un bo exemplo de precarización das condicións laborais ala onde vai” explica Rubén Pérez.
O grupo municipal da Marea de Vigo pide que, por parte da dirección xeral de comercio, se leve a cabo xa un estudo sobre o impacto que pode ter este novo espazo no comercio local, do mesmo xeito que, tal e como pediu con respecto ao proxecto de Porto Cabral, a Xunta estude e estableza unha moratoria sobre calquera solicitude de licenza para a construción de centros comerciais que se presente no Concello de Vigo, que iría vinculada á redacción do novo PXOM.
Marea de Vigo pídelle aos promotores e mesmo ao propio alcalde “seriedade en canto as cifras de emprego que se están a barallar, xa que nin é soamente unha cuestión cuantitativa senón de calidade do emprego, nin se están tendo en conta os posibles efectos no comercio local da zona onde poden chegarse a destruír moitos postos de traballo”.
