O Festival Primavera do Cine de Vigo continuará este domingo coa súa oferta audiovisual que se prolongará ata o día 14 de maio, data na que se celebrará a entrega de premios e a gala de clausura do certame.
Mañá, día 7, están previstas actividades no Auditorio do Marco-dende as 11- e de tarde- noite, no Auditorio Municipal do Concello. Os máis pequenos poderán gozar de dúas sesións, programadas, para as 11.00 e as 12.30 h respectivamente, de 6 curtametraxes de animación infantil no Auditorio do Marco.
A tarde de cinema no Auditorio Municipal dará comezo ás 17.00 h con esa mesma oferta de animación infantil e continuará, ás 18.30 h, cun bloque de 5 curtametraxes galegas. A xornada rematará, neste mesmo escenario, ás 22.00 h, coa curtametraxe brasileira Entremundo, que narra a vida nunha veciñanza de Sao Paulo e co documental Mataram Nossos Filhos, que aborda a temática da violencia no Brasil.
