Un día despois do levantamento do esqueleto de Cornelia, os osos dunha muller nova, xurde un novo achado no xacemento arqueolóxico da Lanzada. O equipo de arqueoloxía da Deputación de Pontevedra e a antropóloga física Olalla López, da Universidade de Santiago de Compostela, atoparon este martes o corpo dun bebé a aproximadamente 5 ou 6 metros de onde se atopaban os restos de Cornelia.
Segundo indica Olalla López, que xa participara no estudo dos esqueletos que xurdiron nas escavacións da Lanzada nas décadas dos 60 e 70, trátase da primeira vez que aparecen ósos dun bebé na Lanzada.
Trátase dun neonato moi deteriorado que se atopaba encollido nunha zona de area situada 5 ou 6 metros de Cornelia pero que non ten que implicar relación co da muller nova atopada este luns, pero si é unha novidade desde o punto de vista antropolóxico xa que se pensa que naquela época non se enterraban os menores dun ano.
Os primeiros indicios apuntan a que se trata dun esqueleto de igual época que Cornelia, é dicir, do século I despois de Cristo. O equipo de arqueoloxía da Deputación de Pontevedra e a doutora López atópanse extraendo os ósos do pequeno e non descartan que aparezan novos esqueletos similares.
