A economía galega acumula catro trimestres consecutivos de crecemento pero o feito de que o incremento sexa «moito menor que o do Estado”, que pechou 2014 cun aumento do Producto Interior Bruto (PIB) do 1,4%, fronte ao 0,4% de Galicia, contrarresta a «sensación» de recuperación económica.
Iso foi o que afirmou, este xoves, o economista e ex presidente do Goberno galego Fernando González Laxe, coordinador do quinto informe de conxuntura socioeconómica que o Foro Económico de Galicia presentou en Compostela.
Na devandita recuperación, a economía galega «non segue a española, vai máis devagar e presenta menos solidez».
Este escenario, segundo advertiu, leva á conclusión, no apartado do mercado laboral, de que o PIB galego «ten que crecer moito máis para xerar emprego».
Outra das principais advertencias lanzadas por esta plataforma é a relativa á produtividade: cae en Galicia, o que revela un problema «de concepción ou de funcionamento».
Segundo González Laxe, da crise, “que deixou pegadas profundas, secuelas e gretas que esixen reparación”, sáese a través de modelos, cun cambio de produtos, valores ou funcionamento; ou fortalecendo a propia dinámica interna.
Para o Foro Económico de Galicia, «os modelos non están a responder, e faise preciso buscar outros máis consolidados», sobre unha industria potente, empresas de maior tamaño e con maior inversión para gañar competitividade no mercado exterior.
