O vigués Fran Alonso ven de publicar o poemario ‘Poética’, un libro feito para ler en ordenador, tabletas e móbiles, e que se ofrece en galego, castelán e portugués. Segundo o propio autor, trátase dun «paso decisivo e pioneiro para a literatura electrónica»:con ‘Poética’, Alonso aborda a poesía dixital e transmedia, ademais de explorar as posibilidades expresivas das novas tecnoloxías na creación literaria.
O seu discurso, «ácido e «corrosivo», segundo o escritor, sobre a propia poesía e os mitos e tópicos, «supera» o concepto tradicional de poema para «acomodarse» no de «instalación poética». De feito, empregou distintas linguaxes contemporáneas cun espírito «lúdico», «provocador», «contraditorio», que «confunde», «experimenta», «investiga» e dá lugar a un poemario «diferente», «multifocal», «polidiscursivo», «fragmentario» e «irónico».
‘Poética’ está editado polo seu propio autor, quen tamén se encargou da maquetación online: a editorial elixida é Pitipoto e Estudi Limona realizou o deseño e o desenvolvemento web.
