Os pais que o desexen poderán solicitar dende este martes unha praza nalgunha das 157 escolas infantís públicas da rede ‘A Galiña Azul’ para as que a Consellería de Traballo abriu o prazo de inscrición, que se prolongará ata o 23 de marzo.
Como informou este luns a directora xeral de Familia e Inclusión, a relación provisional de admitidos e en espera se publicará o 5 de maio e o listado definitivo estará dispoñible o 29 do mesmo mes. Os admitidos terán de prazo entre o 1 e o 10 de xuño para matricularse nas case 9.300 prazas públicas dispoñibles para nenos de entre 3 meses e 3 anos.
Este curso incorpóranse á rede autonómica 409 prazas das novas escolas de Boiro, Cambre, Malpica, Melide, Muros, Oroso, Porto do Son e Salvaterra; así como as 123 prazas dos centros infantís de Narón e Meira, ata agora de xestión municipal.
Para optar a algunha destas prazas, os nenos terán que ter a súa residencia fixada en Galicia e nacido no momento de presentar a solicitude. Ademais, terán que contar con polo menos tres meses no momento do ingreso e non cumprir os tres anos antes do 31 de decembro deste ano. Este último requisito será flexible para os nenos con necesidades educativas especiais.
Entre as novidades, se equiparará a situación laboral das familias monoparentais coa das familias nas que o neno conviva cun só proxenitor. Así mesmo, teranse en conta as variacións económicas na renda da unidade familiar ata o momento da presentación de solicitudes. Ata agora, era necesario manter estas variacións durante un período de catro meses para ser valoradas.
