O 061 atendeu a 71 persoas debido a 51 accidentes de tráfico rexistrados a fin de semana na rede viaria galega, sendo o sábado a xornada na que se rexistraron máis sinistros, con 21. A Central de Coordinación atendeu, entre as 3 da tarde do venres e as 12 da noite menos un minuto deste domingo, 59 chamadas en relación con accidentes de circulación.
Os recursos sanitarios mobilizados polo 061 ascenderon a 70. Así, as ambulancias medicalizadas acudiron a seis sinistros; as asistenciais realizaron 58 saídas; e as convencionais, tres; mentres que os médicos de Atención Primaria prestaron asistencia en tres ocasións.
En 63 casos os feridos foron levados aos centros sanitarios correspondentes e en oito ocasións recibiron asistencia no lugar do incidente sen necesitar traslado.
Pontevedra, con 27, foi a provincia con máis accidentes rexistrados durante os desprazamentos da fin de semana; seguida da Coruña, con 14; Lugo, sete; e Ourense, tres.
