Destacados

O 19% dos pensionistas que teñen que facer fronte ao copago dos medicamentos non segue os tratamentos

Case o 19 % das receitas prescritas por os seus facultativos a pensionistas galegos que deben aboar parte dos seus fármacos- copago- non son recollidas nas farmacias. Así o sinala un estudio sobre o nivel de adherencia aos tratamentos farmacolóxicos realizado polo Servizo Galego de Saúde (SERGAS) e que foi presentado polo xerente deste organismo.

Antonio Fernández-Campa asegurou que esta información “non determina que os pacientes tomen efectivamente os medicamentos” e comentou que o feito de que non os recollan pode deberse a “diferentes motivos, entre eles que xa dispoñan dese fármaco na casa”.

Grazas á implantación da receita electrónica, o Sergas analizou a recollida ou non de 30 millóns de receitas prescrita en Galicia entre xaneiro e xullo deste ano. Ademais, os datos foron analizados baseándose en distintos grupos, o de persoas que acceden de forma gratuíta aos fármacos -perceptores de pensións non contributivas, da Risga ou desempregados sen prestación- , o de pensionistas que si teñen achega e o do resto de usuarios -tamén segundo o seu nivel de renda-.

Entre os principais resultados do estudio, Fernández-Campa explicou que o 83,5 % das receitas expedidas a usuarios exentos de achega económica foron recollidos, mentres que no caso dos pensionistas con copagamento, a cifra baixou ata o 81,1 % de receitas recollidas, ainda que non quixo entrar nas razóns concretas desta diferenza, que cualificou como “non estatisticamente significativa”, alegando que non se pode atribuír unicamente a motivos económicos.

Con todo o xerente do Sergas amosouse satisfeito por estes datos, que evidencian que as cifras de adherencia terapéutica en Galicia “son mellores” que as globais preditas pola Organización Mundial da Saúde.

 

También te puede interesar