A costa galega seguirá este domingo en alerta laranxa por fortes ventos no mar e ondas que poderán alcanzar os 7 metros, segundo os datos do servizo de adversos meteorolóxicos de MeteoGalicia.
En concreto, a costa permanecerá en alerta por ondas de entre 5 e 7 metros dende as 12 da noite deste domingo ata o mediodía, momento a partir do cal o aviso será amarelo. Así mesmo, o forte vento no mar tamén obrigará a activar o aviso laranxa a partir desa hora en toda a costa.
Este fenómeno adverso tamén afectará á Mariña Lucense, onde dende o mediodía ata as 12 da noite do luns, poderán rexistrarse refachos superiores aos 100 quilómetros hora. Ademais, activarase a alerta amarela por fortes ventos na provincia de A Coruña, na Montaña de Ourense e Lugo, no interior de Pontevedra, onde os refachos poderán alcanzar os 80 quilómetros por hora.
Durante o día das Cabalgatas, os ceos estarán moi anubrados pero con poucas chuvias, concentradas nas comarcas do oeste da Coruña e puntos illados de Pontevedra. Á noite, achegarase unha nova fronte que deixará chuvias localmente fortes. As temperaturas mínimas rexistrarán descensos en zonas do interior, mentres que notaremos un lixeiro ascenso das máximas.
Por cidades, A Coruña, Ferrol e Pontevedra marcarán unha máxima de 14º, en Vigo haberá 13 (cunha mínima de 7).
Luns
O luns, Día de Reis, comezará cun temporal de vento e chuvia durante a madrugada, pero o tempo tenderá a mellorar co paso das horas. Durante a mañá as chuvias iranse facendo menos frecuentes e intensas, comezando polo noroeste e avanzando cara ao sur e o interior esta melloría. Xa pola tarde non se agardan apenas chuvias e incluso se abrirán grandes claros no interior. As temperaturas durante esta xornada serán suaves, posto que as mínimas ascenderán entre moderada e notablemente, mentres que as máximas manteranse ou ascenderán lixeiramente.
Por cidades, A Coruña chegará aos 16 graos, Ourense, Ferrol e Santiago, aos 15, en Vigo a máxima será de 14 e a mínima de 13.
