Os galegos apúntanse a ter un coche máis verde. O Plan de Vehículos Eficientes 2010 que a Xunta outorga a través do Instituto Enerxético de Galicia (Inega) xa ten 167 solicitudes, 165 para adquisicións de vehículos híbridos e 2 transformacións a GLP, o que supón un importe de 390.300 euros e o 76,5% do orzamento destinado para a potenciación da eficiencia enerxética no sector dos medios de transporte.
A Xunta prevé que ao final do prazo haberá unhas 245 solicitudes entre adquisicións e transformacións que se desenvolverán nos 2o talleres ou concesionarios que participan na campaña. Un plan que trata de potenciar a renovación e modernización do parque automobilístico galego mediante a concesión de axudas para a compra de vehículos novos menos contaminantes ou transformacións, ademais de promoverse a diversificación enerxética para reducir así a dependencia do petróleo.
As axudas para os vehículos turismos híbridos enchufables, eléctricos puros, de combustión directa de hidróxeno ou de pilas de combustible o importe máximo da axuda por vehículo poderá alcanzar os 7.000 euros; 2.300 para os vehículos turismos híbridos Full Hybrid e de 2.000 euros para os vehículos turismos Mild Hybrid.
No caso dos vehículos novos ou transformados nun prazo inferior a 3 meses desde a súa primeira matriculación alimentados por gas natural e GLP, o importe máximo do vehículo é de 1.200 euros, e para transformacións a GLP, o máximo é de 450 euros. Por último, a compra de motocicletas eléctricas puras, híbridas, de hidróxeno ou pila de combustible incentívase cun importe máximo de 750 euros. En todo caso a contía máxima da subvención será do 15% do prezo do vehículo no mercado, entendendo por este o prezo final de compra.
