Un total de 120 mozos e mozas de Galicia e do norte de Portugal participaron hoxe nunha xornada práctica de creación de empresas e asociacións que se está a desenvolver en Chaves (Portugal). Esta actividade está organizada pola Dirección Xeral de Xuventude, en colaboración co Instituto Português da Juventude (IPJ).
O responsable desta área da Consellería de Traballo e Benestar, Ovidio Rodeiro, acudiu hoxe a este evento, que se inscribe no proxecto “Espazo Xuvenil”, aprobado no marco do Programa de Cooperación Transfronteiriza Galicia-Norte de Portugal.
En concreto, a xornada que tivo lugar en Chaves ten como obxectivo proporcionar unha formación adicional aos mozos e mozas que a precisan, e facilitarlles unha serie de ferramentas de cara á participación en programas europeos e para dar os primeiros pasos para a creación dunha empresa.
Así, ao longo da actividade, presentaranse casos de éxito e exemplos de boas prácticas na posta en marcha de empresas e asociacións. Para iso, tomarán parte na xornada os mesmos responsables das entidades, como ASPAS, IGAPE, Asociación Española de Coaching ou R Telecomunicacións. Nas súas intervencións, irán mostrando aos participantes os procedementos a seguir para a posta en marcha de proxectos e iniciativas.
Espazo Xuvenil
A xornada celebrada hoxe diríxese tamén a acadar os obxectivos marcados no proxecto Espazo Xuvenil: promover o espírito emprendedor da xuventude galego-portuguesa e fomentar a cooperación institucional en materia de políticas de Xuventude.
O fin último é que os mozos e mozas podan quedar a vivir e traballar na zona transfronteiriza galego-portuguesa.
Como exemplo, a través deste programa, medio cento de mozos e mozas formáronse como monitores de tempo libre para poder traballar a ambos lados da fronteira.
Así mesmo, a Dirección Xeral de Xuventude e Voluntariado organizou o pasado mes de novembro en diferentes puntos de Galicia unhas xornadas para fomentar o espírito empresarial.
Ademais, o director xeral de Xuventude e Voluntariado, Ovidio Rodeiro, ten anunciado que todas estas actividades complementaranse ao longo de 2010 con iniciativas de aprendizaxe específica a través da concesión de bolsas e premios para a creación de empresas e para prácticas nas mesmas. De feito, os alumnos que participen nas xornadas terán prioridade á hora de acceder ás bolsas e premios.
