A concelleira de Economía e Facenda asegurou que o investimento municipal nos nove primeiros meses de 2009 ascende a 37,3 millóns de euros, unha cifra que refrenda a «boa xestión» do goberno local e que é superior ao executado polo Concello nos pasados 2004, 2005 e 2006 xuntos.
Raquel Díaz presentou estas cifras no Pleno ao que levou o estado de execución orzamentaria correspondente ao terceiro trimestre de 2009.
O Partido Popular, segundo o seu voceiro de Economía, asegurou detetar un «problema de xestión» da concelleira porque baixan as fases do licitado e o executado, así como as transferencias de capital. Jorge Conde aseverou asemade que «os datos empeoran» e o goberno local «está a gastar da caixa común de todos os cidadáns», un camiño de «irresponsabilidade» que levará ao endebedamento.
Díaz respostou que as cifras absolutas son positivas, lembrou que o Concello está a recurrir actualmente ao endebedamento con «responsabilidade», unha práctica que están a levar a cabo outras administracións como a Deputación de Pontevedra e a Xunta de Galicia.
Readmisións en Povisa
O pleno tamén aprobou a proposta do BNG unha moción pedindo a readmisión dos despedidos de Povisa. A proposta defendida polo concelleiro Xabier Alonso pedía tamén que a Consellería de Sanidade actúe na mediación do conflito laboral de Povisa.
E regulación laboral da Escola Oficial de Idiomas
Cos votos a favor dos grupos socialista e nacionalista, e os votos en contra do PP, aprobouse a moción presentada pola concelleira Laura López Atrio, na que se insta á Consellería de Educación para que reite a circular 5/2009 que regula as condicións de traballo do profesorado das Escola Oficiais de Idiomas, que escote ós equipos directivos das EOIs e ós sindicatos, se informe axeitadamente da realidade educativa e consensue con eles o funcionamento das Escolas.
