A. Buendía | vigoalminuto
O Porriño prepara a apertura de varios espazos culturais e de lecer que marcarán a recta final do ano e o comezo de 2027. O cine municipal e o novo auditorio abrirán as súas portas en decembro, mentres que a Sala Palacios e a transformación do ámbito de Pío XII teñen a súa estrea prevista para xaneiro.
Así o avanzou o alcalde, Alejandro Lorenzo, durante o almorzo informativo cos medios de comunicación, no que tamén repasou os principais proxectos municipais e anunciou novas actuacións en materia de emprego, urbanismo e servizos.
O calendario de inauguracións chegará despois do período de limitacións electorais que afecta a este tipo de actos e que, segundo indicou o rexedor, remata o 29 de novembro.
Cine gratuíto durante o Nadal
Un dos espazos máis agardados é o cine municipal, que comezará a funcionar en decembro cunha programación gratuíta durante todo o mes, os venres, sábados e domingos. As proxeccións estarán dirixidas a públicos de todas as idades, con especial atención á cativada.
A actuación converte a antiga sala do Centro Cultural nun espazo multifuncional preparado tanto para exhibicións cinematográficas como para conferencias e outras actividades culturais. O investimento total supera os 250.000 euros.
O equipamento audiovisual, subvencionado pola Xunta de Galicia a través da Axencia Galega das Industrias Culturais (AGADIC), supuxo preto de 100.000 euros. A instalación inclúe un sistema de proxección en resolución 4K, unha pantalla profesional de cinco por tres metros, un servidor con capacidade de 16 terabytes e son envolvente.
Estas prestacións permitirán exhibir estreas cinematográficas e ofrecer unha experiencia de proxección profesional sen saír do municipio.
Un auditorio con máis de 350 butacas
O segundo gran equipamento cultural que abrirá en decembro é o auditorio municipal, cuxas obras están a piques de rematar. O espazo disporá de máis de 350 butacas, escenario, camerinos e instalacións técnicas para acoller espectáculos, concertos e outras actividades ao longo do ano.
O proxecto supuxo un investimento próximo aos 2,8 millóns de euros e completará a oferta cultural do Porriño xunto co novo cine.
Pío XII gañará un parque cuberto e un auditorio ao aire libre
A transformación urbana tamén avanzará nos próximos meses. O Concello prevé rematar en novembro a ampliación do ámbito de Pío XII, unha intervención que conectará esta rúa —recentemente humanizada— coas de Domingo Bueno, Ramón González e Antonio Palacios.
A actuación transformará máis de 4.000 metros cadrados ocupados ata agora por aparcadoiros e parcelas residuais nun novo espazo verde e de convivencia. O proxecto inclúe un parque cuberto e unha gran grada que permitirá utilizar a zona como auditorio ao aire libre.
O investimento supera os 2,1 millóns de euros, dos que máis de 1,1 millóns proceden da Deputación de Pontevedra e o resto de fondos municipais.
Lorenzo agarda que a obra estea rematada en novembro, aínda que quedan por acondicionar as fachadas traseiras dos edificios lindeiros, que pasarán a funcionar como fachadas principais tras a transformación do espazo.
A intervención incorpora tamén a instalación artística e urbana El color de la piedra, do estudo Moneo Brock. Para xaneiro, o Concello prevé abrir igualmente o Centro Social da rúa Domingo Bueno.
A Sala Palacios abrirá o 8 de xaneiro
A programación de novas aperturas continuará o 8 de xaneiro coa inauguración da Sala Palacios, que coincidirá co aniversario do nacemento de Antonio Palacios, o arquitecto porriñés ao que está dedicado o espazo.
O proxecto comprende dúas salas conectadas no exterior, cunha superficie expositiva duns 200 metros cadrados. A mostra permanente reunirá materiais inéditos, debuxos, planos, maquetas e documentos relacionados coa vida e a obra do arquitecto, procedentes tanto de fondos propios como de doazóns.
«Pretende ser o lugar de referencia para o estudo de Palacios, do arquitecto pero tamén do debuxante», explicou o alcalde.
Máis espazo para emprendedores e 15 novas incorporacións
Durante a comparecencia, Lorenzo avanzou tamén que o Goberno local prepara a ampliación do Centro Municipal de Emprego de Torneiros para crear novos viveiros de empresas e unha sala destinada a emprendedores. O proxecto estará listo en novembro e o Concello buscará financiamento europeo para executalo. Ademais, estuda instalar outro espazo destas características no casco urbano.
A rolda de prensa serviu tamén para informar da aprobación definitiva do orzamento municipal e da nova relación de postos de traballo (RPT). O Concello prevé incorporar nos próximos meses 15 empregados públicos mediante este instrumento e a bolsa de emprego. Entre as prazas figuran un técnico de medio ambiente, persoal administrativo e de intervención e urbanismo, así como catro novos policías locais.
Bonificacións fiscais para a vivenda protexida
No ámbito económico, o alcalde sinalou que o Concello estuda reducir os impostos municipais que afectan á vivenda protexida. A proposta contempla bonificacións de ata o 95% no imposto sobre bens inmobles (IBI) e no imposto sobre construcións, instalacións e obras (ICIO), co obxectivo de favorecer a promoción de vivendas deste tipo e apoiar promotores e cooperativas.
Lorenzo repasou tamén outras actuacións previstas, entre elas a futura licitación do servizo de parques, xardíns e zonas verdes, as obras da rúa Fernández Areal e a reparación de 11 pistas deportivas nas parroquias.
O orzamento municipal reserva ademais fondos para actuacións en Casal, en Budiño, na praza de Sol, no parque Ordóñez e na rede de saneamento. Ao mesmo tempo, están próximas a comezar as obras de rexeneración urbana de Torneiros.
OuTraS NoVaS
- La tragedia ferroviaria de Toledo deja 68 muertos y 58 heridos, 15 de ellos muy graves
- O cine municipal do Porriño abrirá no Nadal e o auditorio antes de rematar o ano
- Al menos, 50 muertos en el choque de un AVE y un Iryo en Toledo
- La Diputación cerrará el mandato tras haber destinado 66,8 millones a Vigo en cuatro años
- Stellantis Vigo lidera un proyecto de 24,6 millones para transformar la fábrica con inteligencia artificial y robótica
