María L. García | vigoalminuto
Galicia afonda no seu saldo demográfico negativo. A comunidade rexistrou entre xaneiro e marzo 3.086 nacementos e 9.185 falecementos, segundo os datos provisionais publicados este venres polo Instituto Galego de Estatística (IGE). Trátase, respectivamente, da cifra máis baixa de nacementos e da máis alta de falecementos nun primeiro trimestre desde 1996, o que deixa unha diferenza de 6.099 mortes máis ca nacementos nos tres primeiros meses do ano.
Os nacementos diminuíron un 2,22% respecto do mesmo período de 2025, interrompendo unha serie de tres trimestres consecutivos de crecemento interanual. Pola contra, as defuncións aumentaron un 0,32% e encadean xa tres trimestres con taxas interanuais positivas.
A evolución dos nacementos foi diferente segundo o sexo. Os de nenos aumentaron un 2,27%, mentres que os de nenas diminuíron un 7,18%.
Pontevedra concentra máis dun terzo dos nacementos
As provincias occidentais concentraron máis de tres cuartas partes dos nacementos rexistrados no trimestre. A Coruña reuniu o 43,36% e Pontevedra, o 34,96%, de modo que entre ambas sumaron o 78,32% do total. Lugo concentrou o 12,7% e Ourense o 8,98%.
A evolución respecto do primeiro trimestre de 2025 tamén foi desigual. Os nacementos aumentaron en Lugo, un 2,08%, e Pontevedra, un 1,41%, mentres que caeron na Coruña, un 4,29%, e especialmente en Ourense, cun descenso do 10,65%.
A idade segue sendo outro dos trazos máis significativos da natalidade galega. O 62,54% dos nacementos correspondeu a nais de entre 30 e 39 anos. As mulleres de 40 a 44 anos representaron xa o 13,25% dos nacementos e as maiores de 45 anos, outro 2,2%.
Máis de seis de cada dez mortes corresponden a persoas de 85 anos ou máis
No caso das defuncións, o incremento interanual debeuse ao comportamento das mulleres. Entre elas contabilizáronse 79 mortes máis, mentres que entre os homes se rexistraron 50 menos.
Por provincias, as defuncións aumentaron en Pontevedra, un 3,29%, e Lugo, un 2,91%. Pola contra, diminuíron na Coruña, un 1,71%, e Ourense, un 2,79%.
A idade marca con claridade a distribución das mortes. O 56,06% das persoas residentes en Galicia que faleceron no primeiro trimestre tiña 85 anos ou máis. Outro 34,57% tiña entre 65 e 84 anos.
A maior presenza feminina nas idades máis avanzadas tamén se reflicte nas estatísticas: entre as persoas de 85 ou máis anos, máis do 60% das defuncións correspondéronse con mulleres. Por debaixo desa idade, pola contra, os homes son maioría entre as persoas falecidas.
Os matrimonios rompen cinco trimestres de subidas
Doutra banda, os datos do IGE tamén amosan un cambio na evolución dos matrimonios. Entre xaneiro e marzo rexistráronse 1.409 matrimonios de persoas con residencia prevista en Galicia, fronte aos 1.490 do mesmo trimestre de 2025. É un descenso do 5,44%, despois de cinco trimestres consecutivos con aumentos interanuais.
A pesar da caída, trátase da segunda cifra máis alta nun primeiro trimestre desde o ano 2000.
A evolución foi diferente segundo o tipo de matrimonio. Os celebrados entre persoas de distinto sexo diminuíron en 102, mentres que os matrimonios entre persoas do mesmo sexo aumentaron en 21 respecto do primeiro trimestre do ano anterior.
OuTraS NoVaS
- Galicia toca fondo demográfico: só 3.086 nacementos fronte a 9.185 mortes
- Denunciado un furtivo con más de 25 kilos de centollo y nécora
- Prohibido el baño en O Carreiro por contaminación microbiológica
- Juaniña, la vecina de 101 años que presentará a Kate Ryan este sábado en O Porriño
- Los 20 eventos que marcan el último fin de semana de septiembre en Vigo
