
O Museo de Arte Contemporánea de Vigo (MARCO) acollerá este xoves, ás 19.00 horas, a estrea en Vigo do documental ‘1846 – Revolución Galega’, unha produción que pretende recuperar para a memoria colectiva un dos episodios máis relevantes da historia contemporánea de Galicia. A sesión celebrarase con motivo do 180 aniversario da Revolución Galega e contará coa presenza do director do filme e investigador, César Caramês.
O documental é o resultado de anos de investigación desenvolvida por Caramês, profesor de Lingua e Literatura Galega en Moraña, co obxectivo de rescatar do esquecemento un acontecemento que, segundo os seus impulsores, foi determinante para entender a evolución política e cultural de Galicia.
Fundación Galiza Sempre
A estrea enmárcase no traballo desenvolvido nos últimos anos pola Fundación Galiza Sempre para divulgar este capítulo histórico. En 2021 publicou o primeiro volume da colección Efemérides da Galiza, dedicado ao 175 aniversario dos Mártires de Carral e elaborado polo historiador Xusto Beramendi. Un ano despois editou unha segunda entrega coincidindo co bicentenario da morte de Antolín Faraldo, da autoría de Henrique del Río. Agora, aproveitando o 180 aniversario da Revolución Galega, a fundación publicou un novo volume específico sobre este movemento, tamén asinado por César Caramês.
Ademais do documental e da publicación desta nova obra, a Fundación Galiza Sempre promoveu, en colaboración coa editora Tempo Galiza, unha edición facsimilar completa do xornal El Porvenir, publicado por primeira vez na súa integridade.

Descoñecida
Os promotores da iniciativa consideran que a Revolución Galega de 1846 continúa sendo unha gran descoñecida para boa parte da sociedade galega e sosteñen que foi reducida historicamente á condición dun simple pronunciamento liberal español con elementos galeguistas, ocultando a súa dimensión política e nacional.
Segundo defenden, esta interpretación dificulta comprender o contexto no que xurdiron algunhas das principais figuras da cultura galega do século XIX, como Rosalía de Castro, Manuel Murguía ou Eduardo Pondal, e minimiza a influencia que aquel movemento tivo na configuración da idea moderna de Galicia como suxeito político.
Os impulsores do documental sinalan tamén que a dixitalización e o acceso ás fontes históricas permiten revisar a narrativa tradicional e ofrecer unha visión máis completa da Revolución Galega, destacando o seu papel como precedente do soberanismo galego e da reivindicación do autogoberno.
O filme reúne as achegas de 17 especialistas de diferentes disciplinas para ofrecer unha análise plural do contexto político, económico, social, cultural e histórico da época. Participan Carlos Callón, Ascensión Cambrón, Camilo J. Cortizo, Uxío Breogán Diéguez-Cequiel, Isidro Dubert, Eliseo Fernández, Manuel Gago, Xurxo Martínez, Francisco Prieto, Juan Renales, Henrique del Río, Francisco Rodríguez, Antom Santos, Goretti Sanmartín, Iria Taibo, Marga do Val e X. Ramón Veiga.
Con esta estrea, a Fundación Galiza Sempre busca contribuír á recuperación e difusión dun episodio que considera fundamental para comprender a historia contemporánea de Galicia e a evolución da conciencia nacional galega.
OUTRAS NOVAS
- Indignante pintada con insultos contra Carmela Silva en pleno centro de Vigo
- El PP mantiene la ventaja, pero las encuestas discrepan sobre la distancia con el PSOE a una semana de las elecciones
- De un Fiat 500 por 8.400 euros a un Alpine de 65.900: los coches que buscan dueño en Vigo
- Caballero denuncia 90.000 pacientes en lista de espera, critica os traslados de médicos en Vigo e pide concentrar o voto no PSOE
- Las desbrozadoras siguen trabajando en el humedal de Barreiro pese a las denuncias vecinales





