Greenfiber, a sociedade impulsada por Altri para construír a fábrica de fibras téxtiles de Palas de Rei, asegura que o proxecto deu un novo paso na súa tramitación ambiental. A empresa afirma que un informe elaborado por Bureau Veritas conclúe que a planta cumpre o principio europeo DNSH («Do No Significant Harm»), un requisito esixido para acceder a financiamento vinculado aos fondos europeos.
Segundo sostén a compañía, con esta validación só quedaría por resolver a Autorización Ambiental Integrada (AAI), que depende da Xunta e que considera o último trámite ambiental pendente para completar o expediente.
Unha fábrica ‘verde’
Altri explica que o informe conclúe que a futura fábrica non provocará un prexuízo significativo en ningún dos seis obxectivos ambientais fixados pola Unión Europea: loita contra o cambio climático, adaptación aos seus efectos, protección da auga, economía circular, control da contaminación e conservación da biodiversidade.
A empresa salienta especialmente que o proxecto prevé reducir de forma moi significativa as emisións de gases de efecto invernadoiro fronte aos procesos tradicionais de produción de celulosa e fibras téxtiles. Tamén asegura que a planta será enerxeticamente autosuficiente, eliminará o uso de combustibles fósiles no proceso produtivo e reducirá de forma notable o consumo de auga grazas aos sistemas de reutilización e recirculación.
No comunicado, Altri sostén ademais que a fábrica incorpora medidas para adaptarse aos efectos do cambio climático, como infraestruturas preparadas para episodios de seca ou inundacións, e que foi deseñada aplicando as Mellores Técnicas Dispoñibles (MTD) europeas para minimizar emisións, vertidos e cheiros.
A compañía lembra que este recoñecemento súmase ao selo europeo STEP recibido o pasado novembro e á Declaración de Impacto Ambiental favorable emitida pola Xunta o ano pasado. Ao seu xuízo, o proxecto xa acredita o cumprimento das esixencias ambientais da normativa europea, estatal e autonómica e só está pendente da autorización ambiental integrada.
Ulloa Viva fala de «propaganda» e cuestiona o informe
A Plataforma Ulloa Viva respondeu de inmediato ao comunicado de Altri e cualificou de «provocación» que a empresa presente como independente un informe que, segundo denuncia, foi encargado e financiado pola propia compañía.
O colectivo tamén critica que Bureau Veritas sexa a mesma certificadora que avalou no seu día a navegabilidade do petroleiro Prestige, unha referencia coa que pretende cuestionar a credibilidade do documento.
Ademais, acusa a Altri de utilizar o informe como unha ferramenta de presión sobre a Xunta para acelerar a concesión da Autorización Ambiental Integrada e sostén que o documento contén afirmacións «sen rigor» e «contradicións evidentes», especialmente no relativo ao consumo de auga.
Ulloa Viva considera incompatible falar de eficiencia hídrica cun proxecto que, segundo lembra, prevé captar 46 millóns de litros diarios do encoro de Portodemouros e devolver ao río Ulla arredor de 30 millóns de litros de auga ao día, ademais de diferentes compostos químicos contemplados na documentación ambiental presentada pola empresa.
OUTRAS NOVAS
- ¿Estrés constante? Estas son las señales de que puedes tener el cortisol alto
- Javier Gutiérrez rueda a las órdenes de Manuel Martín Cuenca en el Balneario de Mondariz
- Kitchen: el juicio del que no se habla y en el que piden 15 años de cárcel para el exministro de interior de Rajoy
- Prepárate para llegar a 35 grados, en Vigo
- Falece Ángel Vila, histórica voz da memoria obreira de Beiramar e referente do movemento veciñal de Vigo
