A XXIII edición do Festival de Cans inicia este martes a súa programación oficial na aldea do Porriño cunha primeira xornada que combinará cinema, homenaxes, actividades educativas e reflexión arredor do audiovisual. O regreso de Julio Medem á longametraxe coa proxección de 8, a lembranza do actor Celso Bugallo e a presenza de centos de escolares marcarán o arranque dun dos eventos culturais máis singulares de Galicia.
O certame chega ao seu inicio tras unha intensa fin de semana previa que rexistrou unha elevada resposta do público. A inauguración da exposición Traballos de cine, do artista Víctor Coyote, xunto co concerto posterior de Julián Maeso, reuniu centos de asistentes no Círculo Recreativo Cultural do Porriño, que completou o seu aforo. O foco internacional dedicado ao cineasta portugués Paulo Carneiro e outras actividades previas serviron tamén para anticipar o ambiente do festival antes do seu inicio oficial.
Acción!
A xornada comezará ás 10.00 horas coa inauguración da tradicional Rúa Efémera «Celso Bugallo», situada no camiño do Jalpón de Aurora, preto do Torreiro de Cans. O recoñecido actor, falecido en decembro de 2025, foi unha das figuras máis queridas do audiovisual galego e mantivo unha estreita relación co festival ao longo da súa traxectoria.
A homenaxe continuará ao mediodía no Baixo de Carlos cunha retrospectiva especial de curtametraxes protagonizadas polo actor, organizada coa colaboración da Fundación AISGE. O cineasta Álvaro Gago participará na sesión presentando Curricán, unha das pezas incluídas na selección e que contou coa participación de Bugallo. A retrospectiva incluirá tamén Calquera infinito posible, de Roi Fernandes, e El bosque del consuelo, de Ethel Jagolkowski.
Cans do futuro
A programación da mañá terá tamén un importante compoñente educativo. O roteiro cinéfilo-literario guiado pola escritora Iria Misa e a actividade Cans do Futuro reunirán centos de nenos e nenas de centros educativos da contorna. O obxectivo é achegar o cinema ás novas xeracións e fortalecer unha das liñas históricas do festival: crear novos públicos e conectar a cultura audiovisual coa infancia e a mocidade.
A primeira xornada servirá tamén para poñer o foco nos chamados «oficios invisibles» do audiovisual, profesións esenciais na creación cinematográfica que adoitan permanecer afastadas da atención pública. Dentro desta aposta, o tradutor e investigador especializado en accesibilidade audiovisual Pablo Romero-Fresco impartirá ás 10.30 horas a masterclass Subtitulado e accesibilidade, centrada nos retos actuais para construír un cinema máis inclusivo.
‘8’ a nova película de Julio Medem
Un dos momentos centrais do día chegará ás 19.00 horas coa proxección de 8, a nova película de Julio Medem, unha das figuras destacadas desta edición do festival. A obra percorre nove décadas da historia de España a través de oito planos secuencia situados entre 1931 e 2021, seguindo os destinos de dous protagonistas unidos por unha narrativa que xoga coa memoria, o paso do tempo e a identidade colectiva.
O filme conta no seu reparto con Ana Rujas, Javier Rey, Álvaro Morte, Tamar Novas, Loreto Mauleón, Carla Díaz e María Isasi, entre outros intérpretes.
XXIII Festival de Cans
A XXIII edición do Festival de Cans desenvolverase ata o vindeiro 23 de maio e volverá reunir cineastas consolidados, novas voces do audiovisual e propostas arredor da memoria, o territorio, o medio ambiente e a creación contemporánea.
Ademais, o festival chega ao seu arranque coa práctica totalidade das entradas esgotadas. As seccións competitivas de Ficción e Animación xa completaron o aforo e só permanecen dispoñibles as últimas localidades para algunhas sesións de Non Ficción e para a actuación de MounQup.
Outras novas
- Renfe cambia los horarios de Vigo y reorganiza las conexiones con Madrid, desde el 20 de mayo
- La huelga médica arranca en Vigo con cifras enfrentadas: del 27% oficial al 81% sindical
- O Festival de Cans arranca con Julio Medem, a homenaxe a Celso Bugallo e case todo esgotado
- Muere una mujer tras ser apuñalada por su hijo en Lugo
- Abierto el plazo de ayudas en Vigo para rehabilitar viviendas vacías y alquilarlas por hasta 700 euros
