O Consello da Xunta aprobou este luns a nova Estratexia de Impulso da Vivenda Protexida en Galicia, un paquete de medidas co que o Goberno galego busca ampliar o acceso a este tipo de inmobles e dinamizar o mercado residencial a prezos accesibles.
A principal novidade é a equiparación dos límites de renda para poder acceder á vivenda protexida cos establecidos para a vivenda pública. Este cambio, anunciado recentemente polo presidente Rueda no debate sobre o Estado da Autonomía, permitirá que un maior número de fogares poidan optar a este tipo de vivendas.
Máis de 3.500€ brutos de ingresos ao mes
Na práctica, isto supón unha subida significativa dos ingresos máximos permitidos. Por exemplo, unha parella cun fillo que ata o de agora tiña un límite de 2.250 euros brutos mensuais poderá chegar a superar os 3.500 euros. No caso das familias numerosas, o teito elevarase ata 4,5 veces o IPREM, o que permitirá que fogares con dous proxenitores e tres fillos accedan a unha vivenda protexida con ingresos de ata 4.150 euros brutos ao mes.
A estratexia incorpora tamén medidas fiscais para abaratar o acceso á vivenda. Entre elas, destaca a bonificación do 100 % do imposto de actos xurídicos documentados nas vivendas protexidas, así como a solicitude ao Goberno central para reducir o IVE ao 4 % neste tipo de operacións.
Apoio aos concellos que impulsen rehabilitación de vivendas
Ademais, o plan contempla novas liñas de apoio económico destinadas aos concellos que impulsen a rehabilitación de vivendas municipais, así como incentivos para promotores privados que constrúan vivenda protexida, co obxectivo de reducir os custos de edificación e aumentar a oferta dispoñible.
Con este conxunto de medidas, a Xunta pretende dar resposta á crecente dificultade de acceso á vivenda en Galicia, ampliando o número de potenciais beneficiarios e favorecendo tanto a promoción de novos inmobles como a recuperación do parque residencial existente.
Outras novas
- A Xunta eleva ata máis de 3.500€ brutos ao mes o límite de renda para acceder a vivenda protexida
- Vigo delimita sus Zonas de Bajas Emisiones: estos son los barrios y quién podrá acceder sin restricciones
- Buscan a una mujer desaparecida en Vigo
- Más de 400 viviendas rehabilitadas en Vigo con fondos europeos en plena polémica por la falta de vivienda nueva
- O ex alcalde Javier Bas esixe actuacións urxentes na N-552 ao seu paso por Chapela
