O sector lácteo denuncia baixadas de até 10 céntimos no prezo do leite e pide intervención urxente

O sector lácteo galego afronta un momento crítico coa renovación dos contratos do leite, que este 31 de marzo chega ao seu prazo límite cunha caída dos prezos que oscila entre os 4 e os 10 céntimos por litro. O Sindicato Labrego Galego-Comisións Labregas alerta de que esta situación compromete a viabilidade das explotacións e solicita unha intervención urxente das administracións.

A baixada do prezo do leite en Galicia coincide cun contexto de aumento dos custos de produción, o que, segundo o sindicato, sitúa a moitas granxas nun escenario de perdas económicas.

🚜🚜 Desde comezos de 2016, gandeiros e agricultores manteñen mobilizacións indefinidas, aparcando os seus tractores no centro de Lugo
📌 O motivo das protestas é o rexeitamento do acordo entre a UE e Mercosur. Consideran que é unha ameaza directa para as súas granxas pic.twitter.com/A60L7ol25C
— Vigoalminuto (@Vigoalminuto) January 16, 2026

Contratos do leite en Galicia: perdas de até 15.000 euros en catro meses

Segundo os datos analizados polo SLG, unha explotación que venda arredor de 200.500 litros podería rexistrar perdas de entre 9.824 e 15.037 euros nun período de catro meses coa nova proposta contractual.

Esta situación débese ás ofertas realizadas por diferentes industrias lácteas, que nas últimas semanas trasladaron contratos cunha redución significativa do prezo por litro. O sindicato sinala que estas condicións poden obrigar ás gandeiras e gandeiros a traballar por debaixo dos custos de produción.

Lei da Cadea Alimentaria: o sector denuncia posibles incumprimentos

O SLG advirte de que estas prácticas poderían vulnerar a Lei da Cadea Alimentaria, que establece a obrigatoriedade de que os contratos cubran os custos de produción e regula os prazos de negociación.

Segundo a normativa, as negociacións deben realizarse en prazos razoables e sen prácticas que debiliten a posición das explotacións. Porén, o sindicato considera que o actual proceso de renovación evidencia unha situación de abuso.

Denuncia ante a AICA e mobilizacións do sector

Ante esta situación, o colectivo presentou unha denuncia ante a Axencia de Información e Control Alimentarios (AICA) para que investigue os contratos e reforce os mecanismos de control.

Ademais, o pasado 23 de marzo o sector protagonizou unha mobilización fronte á fábrica de Lactalis en Vilalba para amosar o seu rexeitamento ás baixadas propostas.

Chamamento á Xunta e ao Ministerio para actuar de inmediato

O SLG insiste en que tanto a Xunta como o Ministerio deben actuar de forma inmediata para garantir o cumprimento da lei e evitar a venda a perdas. Advirten de que, de non adoptarse medidas, continuarán as mobilizacións en defensa do sector.

Desde a organización subliñan que o leite é un dos produtos máis representativos de Galicia e que a súa produción resulta clave para o mantemento do medio rural e da economía agraria.