A programación do Entroido 2026 en Vigo arrinca marcada pola meteoroloxía. Ante a previsión de choiva e vento, o Concello viuse na obriga de cancelar os actos previstos para este venres, aínda que mantén o núcleo central da festa durante a fin de semana e reforza os servizos de transporte urbano para garantir a mobilidade.
Este venres non se poderá celebrar a animación de rúa con charanga e batucada nin o tradicional desfile de cabezudos pola rúa do Príncipe. Ademais, queda aprazada a actuación da Orquestra París de Noia, un dos pratos fortes do Entroido en Vigo 2026, que se traslada ao vindeiro venres 20 de febreiro ás 21:00 horas na Porta do Sol.
En principio, si se manterá ás 20:00 horas a entronización do Meco na Porta do Sol, acto simbólico que marca o inicio oficial das celebracións.
Sábado grande do Entroido en Vigo
O sábado 14 de febreiro será a xornada central do Entroido 2026 en Vigo, se as condicións meteorolóxicas o permiten. Desde as 17:00 horas haberá animación de rúa en Príncipe e, ás 18:00 horas, dará comezo o gran desfile do Entroido.
O desfile-concurso contará coa participación de 23 comparsas da cidade e da comarca e partirá da rotonda de Isaac Peral para percorrer García Barbón, Policarpo Sanz e Colón. O Concello repartirá 18.500 euros en premios, consolidando esta cita como un dos eventos máis destacados do calendario festivo vigués.
Domingo con música, chocolatada e alternativa en caso de choiva
A programación do Entroido de Vigo 2026 continúa o domingo 15 de febreiro con animación de rúa en Príncipe e Porta do Sol. Pola mañá actuará a batucada “Lenha Verde” de Matamá e pola tarde a “Charanga Imperiais” e a batucada “Bate no Cobre”.
- Ás 17:30 horas celebrarase o concerto infantil de “Uxía Lambona e a banda molona” na Porta do Sol
- chocolatada popular ás 19:00 horas
- e o concerto de “Crónicas Pop” ás 20:00 horas
En caso de choiva, as actividades trasladaranse á lonxa do Concello e ao Auditorio Municipal da Praza do Rei. O goberno local recoñece que irá adaptando a programación para “esquivar o mal tempo” na medida do posible.
Luns e martes: talleres, concurso de disfraces e queima do Meco
O luns 16 de febreiro desenvolveranse talleres infantís (máscaras e pintacaras) entre as 17:00 e as 20:00 horas, con animación de rúa en Príncipe e concerto das Pamisukis ás 18:00 horas. Se a climatoloxía é adversa, as actividades trasladaranse a espazos cubertos.
O martes manterase a animación de rúa, sairán “Os merdeiros” e cabezudos, e celebrarase o concurso de disfraces —infantil e adulto— con premios nas distintas categorías. Ás 20:00 horas haberá espectáculo de lume con “A saco circo” e ás 20:45 celebrarase a tradicional queima do Meco, acompañada pola banda de Corneta do Centro Social e Cultural de Beade e a peña Xuntanza.
Enterro do Meco e peche do Entroido 2026
Finalmente, o mércores 18 de febreiro terá lugar o peche oficial do Entroido en Vigo 2026. Ás 18:00 horas celebraranse as exequias funerarias do Meco, seguidas do desfile da comitiva fúnebre co acompañamento da Banda de gaitas da ETRAD e o grupo de percusión “Lenha Verde” de Matamá. Ás 19:30 horas farase pública a acta do xurado do concurso de comparsas.
Reforzo do transporte urbano nocturno
Para facilitar os desprazamentos durante as principais xornadas do Entroido 2026 en Vigo, o Concello habilita un servizo nocturno especial. Este venres 13, sábado 14 e luns 16 estarán operativas as liñas N1, C1 e N4 durante a noite. Ademais, a liña C1 duplicará a súa frecuencia venres e sábado, con autobuses cada 15 minutos.
Outras novas
- Vigo reorganiza o Entroido 2026 pola choiva: París de Noia aprazada e mantense o gran desfile
- Este viernes llega ‘Oriana’, la novena borrasca de 2026, tras 45 días consecutivos de lluvia en Vigo
- Detenido en O Porriño con 50 gramos de cocaína en roca y dosis preparadas para la venta
- María Dolores Gimeno Durán hace historia como la primera mujer coronel de la Guardia Civil
- Taburete, Juan Magán, Álvaro de Luna y Marlena se incorporan al cartel del Galicia Fest en Vigo
