A vicepresidenta da Deputación de Pontevedra, Luisa Sánchez, acaba de anunciar a convocatoria da comisión de seguimento do convenio co Concello de Vigo para o martes, 11 de xuño, na sede de Vigo da Deputación.
O obxectivo da mesma é trasladar aos representantes municipais a proposta dunha “solución excepcional” ao acordo bilateral que está a piques de perder a súa vixencia.
Mellora da mobilidade ou recuperación de Samil
Tal e como se comprometera na reunión anterior, celebrada no mes de abril, a vicepresidenta xunto á
deputada provincial María Ramallo, leva semanas traballando nunha «saída satisfactoria en cumprimento
dos acordos do Convenio de colaboración entre o Concello de Vigo e a Deputación de Pontevedra», para a execución dun plan de mellora da mobilidade urbana sostible na cidade de Vigo 2021-2023, recuperación do sistema dunar na praia de Samil e mellora da cubrición do patio no colexio Javier Sensat, e preservando o bo uso dos fondos públicos.
Vontade de acordo
Respecto á comisión de seguimento, Sánchez reiterou a «vontade e absoluta disposición da Deputación a colaborar e chegar a acordos co Goberno municipal en beneficio da cidade» como así, dixo, “o estamos a demostrar, con feitos”, en clara referencia ao convenio co Concello de Vigo para a reforma da grada de Gol aprobado no pleno do pasado venres.
