Distintas dependencias municipais de Ponteareas, como o Centro Social e o Mercado de Abastos están sufrindo cortes do luz que, o actual Goberno local asegura, están causados pola débeda do ‘bipartito BNG-PSOE’. Apuntan a que estes problemas so subministro débense «ao impago da débeda contraída», e lembran que esta situación xa se producira no mandato anterior.
Un desfase de preto dun millón de euros
Así, subliña a alcaldesa, «un dos principais buracos económicos que deixou en herdanza o anterior bipartito é o do alumeado público». Na rolda de prensa na que fixo balance dos primeiros cen días de xestión, Nava Castro amosou un desfase, entre a partida adicada a tal efecto e a realidade, de «preto dun millón de euros». Por este motivo o equipo de Goberno convocará un Pleno extraordinario urxente para realizar o recoñecemento extraxudicial das cantidades adeudadas pendentes de abonar, en canto se teña resposta favorable da proposta efectuada á compañía subministradora por parte do Concello, e xerar unha partida orzamentaria a tal fin, presumiblemente a través dun préstamo.
2,5 millóns en facturas impagadas e 9 millóns de débeda
Castro explicou que a partida orzamentaria de 300.000 euros para to un ano destinada ao pago da luz era claramente insuficiente cando o servizo está valorado 1,3 millóns de euros. Se ben é certo, engadiu, que os fondos poderían obterse de outras partidas non executadas, non foi así e ao momento de chegar á Alcaldía, o actual grupo de goberno atopouse con só 97.000 euros de liquidez entre o 17 de xuño e o vindeiro 31 de decembro. Unha liquidez que non resultou ser tal xa que existen 2’5 millóns de euros en facturas impagadas e 9 millóns de débeda.
Por iso, o Goberno local, apuntou a alcaldesa, leva semanas negociando para reverter e emendar esta situación á maior brevidade posible e restablecer a normalidade en todos os centros. Neste sentido, Nava Castro subliñou que aqueles considerados servizos de primeira necesidade, como os centros educativos ou residencias teñen o subministro garantido.
