Están abertos dende a pasada fin de semana
Desde a pasada fin de semana, están abertos os aseos públicos da ETEA, no antigo edificio dos vestiarios, no actual parque público. Así, a construción destes aseos, «é un novo logro da veciñanza de Teis, despois das mobilizacións do pasado verán«. Nas mesmas, denunciaron o abandono da antiga Escola de Transmisións da Armada, «tanto por parte do Concello de Vigo como da Xunta de Galicia«.
No caso da colocación dos aseos públicos, tanto o Concello como a Xunta, «poñían escusas para non realizar esta actuación tan demanda desde había anos»… discutindo sobre de quen era a competencia ou quen se ía encargar do seu mantemento.
A cafetaría segue pendente
Con todo, e pese a que o pasado 30 de novembro de 2022, a delegada da Xunta, Marta Fernández-Tapias, anunciaba varias actuación nos terreos da ETEA, entre elas que o edificio que ocupaba a antiga panadería serviría como cafetaría, (asegurando que xa tiña contratado un estudo de viabilidade)…a realidade é que «a dia de hoxe descoñecemos ese estudo e aínda non hai ningunha data para a construción desa cafetería».
A ETEA segue abandonada
Desde a Asociación, seguen pendentes das actuacións importantes para a recuperación da ETEA. Como exemplos do abandono, citan a urxencia da urbanización do PS-1, «bloqueada polo Concello de Vigo», ou a construción da anunciada residencia para os nosos maiores, prometida hai 6 anos pola Xunta. Despois da saída dos militares no ano 2002, «segue abandonada pola falta de vontade política do Concello e da Xunta».
