Será o Centro de Asociacionismo de Vigo
A delegada da Xunta en Vigo, e candidata á Alcaldía polo Partido Popular, Marta Fernández-Tapias, destacou este martes o «éxito do concurso de ideas», convocado para o novo Centro de Asociacionismo da cidade despois de pecharse o prazo de recepción de proxectos cun total de 29 propostas.
Vello edificio dos xulgados, na rúa Lalín
As bases do concurso de ideas para remodelar o vello edificio dos xulgados e convertelo no novo Centro de Asociacionismo publicouse o pasado mes de novembro e pechouse este luns, 23 de xaneiro. O proceso lévase a cabo despois de que o Goberno galego e o Colexio de Arquitectos de Galicia (COAG) firmasen un convenio en busca do mellor proxecto.
Segundo inclúe o prego de condicións do concurso, o inmoble da rúa Lalín terá un auditorio con aforo para 400 persoas, unha sala de exposición, 6 salas de reunións, 5 salas de ensaio e 5 salas polivalentes, todas elas para uso por parte das asociacións.
Cesión ás asociacións da cidade
Esta actuación pretende habilitar locais na planta baixa e da primeira e quinta do edificio e a súa cesión a asociacións da cidade. Ademais, tamén se poderán trasladar dependencias administrativas que están a ocupar oficinas alugadas. Os traballos poderían estenderse a outras tres plantas -os 2 sotos e o semisoto– que na actualidade se destinan a aparcamento e zona de arquivos, polo que poderían habilitarse unhas 134 dependencias.
12,6 millóns
As obras inclúen intervencións na carpintaría, revestimentos, acabados e instalacións, así como a mellora da eficiencia enerxética da envolvente do edificio. O orzamento estimado para intervir na totalidade do edificio -incluíndo as tres plantas do soto- ascende aos 12,6 millóns de euros.
Nesta contía inclúense 100.000 euros para os premios do concurso de ideas e máis de 409.000 euros para a redacción do proxecto derivado do concurso e a dirección de obra. Nos orzamentos resérvase un crédito de 3 millóns de euros co obxectivo de «botar a andar o proxecto e comezar a súa posta en marcha o antes posible«.
