A oposición denuncia que a alcaldesa quere que «sexamos un pobo a escuras»
«Os cortes de luz nas parroquias son cada vez máis frecuentes xa que o goberno do BNG tomou a decisión de aforrar cartos dándolle para abaixo o interruptor do alumeado público».
Esta é a denuncia do Grupo Popular dende o que denuncian que «nestes momentos están alternando os cortes por zonas, de xeito que acenderán unha noite en Amorín, outra en Barrantes, outra en Goián…».
Os responsables populares apuntan que a administración local debería ter a capacidade de previr situacións excepcionais «mediante unha xestión prudente e sensata dos cartos dos veciños». Pero, aseguran, «en Tomiño non é así».
Denuncian que «o Goberno municipal quere converter un ben de primeira necesidade como é a luz nun privilexio», o cal, insisten, vai máis aló do custo actual da enerxía.
Nesta liña subliñan que «malgastar os cartos sen sentido en obras inxustificadas ao longo dos anos de mandato, ten
consecuencias perniciosas e agora tócanos pagar o pato aos de sempre«. Así, aseguran que o goberno local está a
aproveitar a situación actual como escusa da súa «incompetencia xestora durante os 15 anos de mandato e en 2023 terá consecuencias reflectidas nas urnas».
Ademáis, continúan, «desde que se impuxo esta medida xa aumentaron as denuncias por roubos e consta que están
entrando en vivendas do barrio do Carregal de Arriba, na parroquia de Amorín».
Á vista destes feitos instan á alcaldesa, Sandra González, a reverter esta situación que cualifican de «insostible» e advirten de que «tomaremos medidas legais se estas decisións seguen tendo prexuízos directos para os nosos veciños».
