O Concello do Porriño executará un ambicioso plan de obras para mellorar a accesibilidade das rúas do centro urbano. Alejandro Lorenzo, acompañado do edil de Vías e Obras, Ramón Porto, e a arquitecta municipal, visitaron a zona onde se proxectan as primeiras intervencións : serán seis rúas- Pinar, José Fernández López, Enrique Peinador, Doutor Paz Varela e Tranvía– e as obras consistirán na renovación das beirarrúas.
Tamén se acometerán melloras nas das rúas Codesal e Cruceiro, onde se eliminarán os afundimentos existentes, e repararanse os bordos e baldosas rotos ou desprazados.
Ampliación e renovación do firme
Planéase tamén ampliar beirarrúas en varios tramos para mellorar o tránsito de peóns, conservando as árbores existentes e plantando algúns exemplares novos, e intervir en puntos nos que se detectaron barreiras arquitectónicas que limitan a accesibilidade a persoas con mobilidade reducida.
A planificación do concello inclúe tamén a renovación do firme de varios destes viais para adecuar, potenciar e acondicionar o que é un dos principais itinerarios peonís da vila.
Mellorar o tránsito dos peóns
«Falamos dunha obra moi necesaria para o tránsito de peóns que ao mesmo tempo recuperará a estética dunha das zonas máis concorridas do Porriño», explicou o alcalde,
«Estas rúas dan acceso ao Centro de Saúde, ao instituto, aos colexios e a moitos servizos que cada día usan os porriñeses, ademais que contar coa maior densidade de poboación do centro urbano. É unha das principais arterias do municipio e debe ser accesible, habitable e disfrutable».
Lorenzo explicou que se trata só do primeiro dos proxectos de obra encargados dentro do plan de mellora da accesibilidade do centro urbano. «Somos conscientes de que non é o único punto do centro que presenta carencias neste sentido», afirmou, «As necesidades que presenta Porriño son moitas e é necesario planificar as actuacións. Desa maneira poderemos dar resposta a todas elas».
