O Bloque Nacionalista Galego vén de urxir o Goberno municipal á reapertura de todos os parques infantís da cidade. O BNG reclama que sexa antes das vacacións de Semana Santa, dentro das medidas de desescalada.
A meirande parte fechados dende outubro
O concelleiro do BNG de Vigo, Xabier P. Igrexas, lembrou que na actualidade só están abertos 15 parques infantís e que a meirande parte destes levan fechados desde mediados de outubro, como resultado dunha decisión «arbitraria sen ningún tipo de base científica e que o único que provocou foi a masificación dun pequeno número de parques».
Igrexas destaca a importancia de habilitar espazos seguros ao ar libre que permitan o esparcemento dos pequenos. «Abel Caballero castigou as crianzas de Vigo sen parques sen ningún motivo e agora cando se están abrindo outro tipo de instalacións e dotacións públicas non hai xustificación para manter os parques fechados», defende.
Propaganda sen data
Para o Bloque o anuncio feito polo alcalde de o Goberno Local acordou iniciar a licitación para a desinfección dos parques infantís é «fume».
«Na orde do día da Xunta de Goberno de hoxe non figuraba ese asunto, e no perfil do contratante do Concello de Vigo non hai ningunha información sobre ese procedemento. «Estamos diante de pura propaganda sen data», reprochou Igrexas. Aliás, lembran que o Goberno municipal asegurou hai varios meses estar a traballar nesta licitación «pantasma» da que nada se sabe e que hoxe se anuncia sen concretar os prazos.
En xullo a desinfección adxudicouse en 24 horas
O portavoz municipal do BNG entende que a reapertura debe producirse coincidindo co inicio das vacacións. «Só depende da vontade política facelo, porque en xullo do ano pasado a desinfección dos parques adxudicouse en menos de 24 horas«.
